یوکرین کا روس کی دو آئل ریفائنریوں پر ڈرون حملہ
قریبی علاقے میں ایک شخص ہلاک اور ایک زخمی ہوا۔ حکام کا کہنا ہے کہ امدادی ٹیموں نے آگ پر قابو پانے کی کوششیں شروع کر دیں۔
یوکرین نے دعویٰ کیا ہے کہ اس کی افواج نے رات کے وقت کارروائی کرتے ہوئے روس کے کراسنودار اور یاروسلاول علاقوں میں واقع دو آئل ریفائنریوں کو ڈرون حملوں کا نشانہ بنایا۔ یوکرینی صدر وولودیمیر زیلنسکی کے مطابق ان حملوں کا مقصد روس کی جنگی صلاحیت کو متاثر کرنا ہے۔
روسی حکام کے مطابق کراسنودار کے شہر سلاویانسک نا کوبانی میں واقع ایک آئل ریفائنری پر حملے کے بعد آگ بھڑک اٹھی، جبکہ قریبی علاقے میں ایک شخص ہلاک اور ایک زخمی ہوا۔ حکام کا کہنا ہے کہ امدادی ٹیموں نے آگ پر قابو پانے کی کوششیں شروع کر دیں۔
دوسری جانب یاروسلاول کے گورنر نے بھی ڈرون حملے کی تصدیق کرتے ہوئے بتایا کہ احتیاطی اقدامات کے تحت ماسکو جانے والی بعض شاہراہوں پر عارضی طور پر آمدورفت محدود کر دی گئی ہے۔
رپورٹس کے مطابق حالیہ مہینوں میں یوکرین نے روس کی تیل اور ایندھن سے متعلق تنصیبات پر ڈرون حملوں میں اضافہ کیا ہے، جس کے باعث بعض علاقوں میں ایندھن کی فراہمی متاثر ہونے اور سپلائی میں مشکلات کی اطلاعات بھی سامنے آئی ہیں۔
آزاد ذرائع سے سامنے آنے والی بعض ویڈیوز میں متاثرہ ریفائنری میں آگ کے شعلے دکھائی دیتے ہیں، تاہم ان ویڈیوز کی آزادانہ طور پر تصدیق نہیں ہو سکی۔