حملے سے متاثرہ جنوبی کوریائی جہاز جلد آبنائے ہرمز سے روانہ ہوگا

جنوبی کوریا کی وزارتِ بحری امور نے کہا ہے کہ مئی میں حملے سے متاثر ہونے والا کارگو جہاز نامو (Namu) مرمت مکمل ہونے کے بعد آبنائے ہرمز سے روانہ ہو جائے گا۔

وزارت کے مطابق ایچ ایم ایم کے زیر انتظام چلنے والا یہ بلک کیریئر 28 فروری سے خلیجی علاقے میں پھنسا ہوا ہے، جب امریکا اور اسرائیل نے ایران کے خلاف جنگ کا آغاز کیا تھا۔

بیان میں کہا گیا کہ اس وقت جہاز دبئی کی ایک بندرگاہ پر مرمت کے مراحل سے گزر رہا ہے اور توقع ہے کہ جولائی کے آخر تک آبنائے ہرمز سے نکل جائے گا۔

ایران نے اس جہاز کو نشانہ بنانے کی تردید کی ہے، جبکہ جنوبی کوریا کا کہنا ہے کہ وہ حتمی طور پر یہ تعین نہیں کر سکا کہ حملے کا ذمہ دار کون تھا یا آیا یہ حملہ جان بوجھ کر کیا گیا تھا۔

نامو پر 32 افراد پر مشتمل عملہ موجود ہے اور یہ آبنائے ہرمز میں اب بھی پھنسے ہوئے جنوبی کوریا کے دو جہازوں میں سے ایک ہے۔ جنوبی کوریائی حکام کے مطابق اب تک 24 جہاز آبنائے ہرمز سے بحفاظت روانہ ہو چکے ہیں۔