ایران امریکا کشیدگی،سفارتی کوششیں مزید پیچیدہ ہوگئیں:کاجا کلاس

یورپی یونین کی خارجہ پالیسی کی سربراہ کاجا کلاس نے کہا ہے کہ ایران اور امریکا کے درمیان حالیہ کشیدگی نے جنگ کے خاتمے اور امن کے لیے جاری سفارتی کوششوں کو مزید پیچیدہ بنا دیا ہے۔

کاجا کلاس نے ایک بیان میں ایران کی جانب سے بحرین اور کویت پر مبینہ حملوں کو ناقابل قبول قرار دیتے ہوئے کہا کہ ایسے اقدامات خطے میں کشیدگی میں اضافے کا باعث بن سکتے ہیں۔

ان کا کہنا تھا کہ ایران نے ایک مفاہمتی یادداشت کے تحت آبنائے ہرمز کو دوبارہ کھولنے کا وعدہ کیا تھا، تاہم حالیہ واقعات اور سمندری راستوں پر پیش آنے والے واقعات سے اس عمل کو نقصان پہنچنے کا خدشہ ہے۔

یورپی یونین کی نمائندہ نے زور دیا کہ آبنائے ہرمز سے بین الاقوامی جہاز رانی کو بلا تعطل جاری رہنا چاہیے اور سمندری راستوں پر آمد و رفت کی آزادی کو یقینی بنایا جانا ضروری ہے۔

انہوں نے بتایا کہ یورپی یونین کے وزرائے خارجہ جلد خلیجی ممالک کے نمائندوں سے ملاقات کریں گے، جس میں خطے کی صورتحال، معاہدوں پر عمل درآمد اور بحیرۂ احمر سمیت اہم سمندری راستوں کے تحفظ پر بات چیت کی جائے گی۔

یورپی یونین کے مطابق خطے میں امن، استحکام اور توانائی کی فراہمی کے لیے محفوظ سمندری راستوں کا برقرار رہنا انتہائی اہم ہے۔