بوشہر۔بندر عباس اور آبنائے ہرمز سے ملحقہ شہروں میں دھماکوں کی اطلاعات

ایران کے مختلف ذرائع کے مطابق امریکی فضائی حملوں میں کم از کم چار صوبوں کے متعدد شہروں میں فوجی اور تجارتی تنصیبات کو نشانہ بنایا گیا ہے۔

رپورٹس کے مطابق صوبہ بوشہر میں کئی دھماکے سنے گئے ہیں، جو اس لیے بھی اہم ہیں کہ یہاں ایران کا ایک جوہری بجلی گھر واقع ہے۔

اسی دوران جاسک میں کم از کم 10 دھماکوں کی اطلاعات موصول ہوئی ہیں، جبکہ سیریک میں بھی متعدد دھماکے رپورٹ کیے گئے ہیں۔ یہ دونوں شہر آبنائے ہرمز کی نگرانی کے حوالے سے انتہائی اہم سمجھے جاتے ہیں۔

اس کے علاوہ بندر عباس، کنگان، بندرِ دیر، عسلویہ اور جنوب مشرقی ایران میں کنارک اور اس کے گردونواح میں بھی دھماکوں کی اطلاعات سامنے آئی ہیں۔

رپورٹس کے مطابق گزشتہ چند راتوں کے دوران ایران پر حملوں کا دائرہ کار مسلسل وسیع ہوتا جا رہا ہے، جبکہ ایرانی حکومت نے خبردار کیا ہے کہ اگر حملوں میں مزید شدت آئی تو اس کا بھرپور اور سخت جواب دیا جائے گا۔