امریکی فوج کے ایران پر نئے حملے۔ 140 فوجی اہداف نشانہ بنانے کا دعویٰ

امریکی فوج کی سینٹرل کمانڈ (سینٹکام) نے دعویٰ کیا ہے کہ اس نے رواں ہفتے ایران کے خلاف حملوں کے تیسرے مرحلے کو مکمل کر لیا ہے۔ سینٹکام کے مطابق یہ کارروائیاں آبنائے ہرمز میں قبرص کے پرچم بردار ایک جہاز پر حالیہ حملے کے بعد ایرانی افواج کو جوابدہ ٹھہرانے کے لیے کی گئیں۔

سینٹکام نے اپنے بیان میں کہا کہ اس مرحلے میں تقریباً 140 فوجی اہداف کو نشانہ بنایا گیا، جن میں ایرانی میزائل اور ڈرون تنصیبات، بحری صلاحیتوں سے متعلق مراکز، اسلحہ ذخیرہ گاہیں، مواصلاتی نیٹ ورک اور ساحلی نگرانی کے مقامات شامل تھے۔

بیان کے مطابق رواں ہفتے تین راتوں کے دوران مجموعی طور پر 300 سے زائد اہداف پر حملے کیے گئے، جن کا مقصد ایران کی اس صلاحیت کو کمزور کرنا تھا کہ وہ آبنائے ہرمز سے گزرنے والے شہری ملاحوں اور تجارتی جہازوں کو نشانہ بنا سکے۔

سینٹکام نے مزید دعویٰ کیا کہ امریکی افواج نے مئی کے آغاز سے اب تک 800 سے زائد تجارتی جہازوں کو، جن پر تقریباً 400 ملین بیرل تیل سمیت مختلف سامان موجود تھا، بحفاظت آبنائے ہرمز سے گزرنے میں مدد فراہم کی ہے۔