آئی سی سی کا انٹرنیشنل کرکٹ شیڈول بدلنے پر غور

انٹرنیشنل کرکٹ کونسل کی کرکٹ آپریشنز ورکشاپ دبئی میں شروع ہو رہی ہے، جس کے دوران 2027 سے 2031 تک کے مستقبل کے بین الاقوامی کرکٹ شیڈول پر اہم مشاورت متوقع ہے۔

موجودہ مستقبل کے دوروں کا پروگرام مارچ 2027 میں مکمل ہونا ہے۔ ذرائع کے مطابق دبئی میں ہونے والی ملاقاتوں کے دوران مختلف شیڈولنگ معاملات پر پیش رفت کا امکان ہے، تاہم نئے پروگرام کا حتمی اعلان نومبر میں بالی میں ہونے والے آئی سی سی اجلاس سے قبل متوقع نہیں۔

نئے شیڈول میں مکمل رکن ممالک کے درمیان ٹی ٹوئنٹی بین الاقوامی میچز کی تعداد بڑھانے کی تجویز زیر غور ہے، جس کے نتیجے میں دوطرفہ ایک روزہ میچز کی تعداد میں کمی کا امکان ظاہر کیا جا رہا ہے۔

تاہم ایک روزہ عالمی کپ کی اہمیت برقرار رکھنے پر اتفاق رائے موجود ہے۔ پچاس اوورز کی کرکٹ کو مزید فروغ دینے کے لیے تین یا چار ملکی سیریز کے انعقاد کی تجاویز بھی زیر غور ہیں۔

دوسری جانب آسٹریلیا، انگلینڈ اور بھارت کے درمیان بڑی باہمی سیریز کا شیڈول پہلے ہی طے شدہ ہے۔ ایشیز سیریز 2027، 2029-30 اور 2031 میں شیڈول ہے، جبکہ بھارت اور انگلینڈ کے درمیان ٹیسٹ سیریز بھی نئے دورانیے میں شامل ہیں۔

2028 کے لاس اینجلس اولمپکس میں ٹی ٹوئنٹی کرکٹ کی واپسی بھی عالمی کرکٹ کے شیڈول کے لیے ایک اہم معاملہ ہوگی، جسے مدنظر رکھتے ہوئے مختلف سیریز کی ترتیب طے کی جائے گی۔

ورلڈ ٹیسٹ چیمپئن شپ میں افغانستان، آئرلینڈ اور زمبابوے کو شامل کرنے سمیت دیگر تجاویز پر بھی غور کیا جا رہا ہے۔ اس کے علاوہ ڈی آر ایس ٹیکنالوجی فراہم کرنے والے مزید اداروں کی منظوری بھی اجلاس کے ایجنڈے کا حصہ ہے۔