صاحبزادہ فرحان کو قومی ٹی20 ٹیم کا مستقل کپتان بنانے پر غور

پاکستان کرکٹ بورڈ نے ہیڈ کوچ مائیک ہیسن کی مشاورت سے اوپننگ بلے باز صاحبزادہ فرحان کو قومی ٹی20 ٹیم کا مستقل کپتان بنانے پر غور شروع کر دیا ہے۔ ذرائع کے مطابق یہ فیصلہ 2028 کے آئی سی سی ٹی20 ورلڈ کپ کو مدنظر رکھتے ہوئے طویل المدتی منصوبہ بندی کے تحت کیا جا رہا ہے تاکہ ایک وسیع کھلاڑیوں کا پول تیار کیا جا سکے۔

ذرائع کا کہنا ہے کہ سلمان علی آغا کی جگہ صاحبزادہ فرحان کو یہ اہم ذمہ داری سونپی جا سکتی ہے۔ موجودہ صورتحال میں سلمان علی آغا کی حالیہ بین الاقوامی میچز میں کارکردگی پر بھی سوالات اٹھے ہیں، جس کی وجہ سے قیادت کے معاملے پر نظرثانی کی جا رہی ہے۔

صاحبزادہ فرحان کو پہلے ہی جاپان میں جاری ایشین گیمز کے مینز کرکٹ مقابلوں کے لیے پاکستان کی ٹی20 ٹیم کی قیادت سونپی گئی ہے، جہاں قومی مہم کا آغاز 28 ستمبر کو کوارٹر فائنل سے ہوگا۔ اس کے علاوہ، انہیں 9، 11 اور 13 اکتوبر کو راولپنڈی کرکٹ اسٹیڈیم میں سری لنکا کے خلاف شیڈول 3 ٹی20 میچز کی ہوم سیریز میں بھی کپتان برقرار رکھے جانے کا قوی امکان ہے۔

ہیڈ کوچ مائیک ہیسن مختصر فارمیٹ میں فرحان کو کپتان رکھنے کے مکمل حق میں ہیں، تاہم ان کی مستقل تقرری کا حتمی فیصلہ ایشین گیمز میں ان کی بیٹنگ اور قائدانہ صلاحیتوں کا جائزہ لینے کے بعد کیا جائے گا۔ مزید برآں، سری لنکا کے خلاف اس آنے والی سیریز میں نوجوان کھلاڑیوں کو زیادہ سے زیادہ مواقع دیے جانے کی توقع ہے۔