پی ٹی آئی والے غنڈے لاکر 9مئی جیسا ایک اور واقعہ کرنا چاہتے ہیں،ڈی آئی جی آپریشنز

لاہور (بیورو رپورٹ) ڈی آئی جی آپریشنز لاہور فیصل کامران نے انکشاف کیا ہے کہ تحریک انصاف (پی ٹی آئی) کے رہنما اور کارکنان شہر میں 9 مئی جیسا ایک اور واقعہ دہرانے کی سازش تیار کر رہے ہیں، جس کے لیے باقاعدہ تربیت یافتہ افراد کو لاہور لانے کا منصوبہ بنایا گیا ہے۔

لاہور میں ایک اہم پریس کانفرنس سے خطاب کرتے ہوئے ڈی آئی جی آپریشنز نے بتایا کہ حالیہ دنوں میں ایک خاتون کی آڈیو سامنے آئی ہے جس میں وہ غنڈہ عناصر کو متحرک کرنے اور لانے کی بات کر رہی ہے، اور یہ متعلقہ خاتون پہلے ہی 9 مئی کے مقدمات میں نامزد ملزمہ ہے۔ فیصل کامران کا کہنا تھا کہ ان غنڈہ عناصر کو باقاعدہ تربیت دے کر لاہور منتقل کرنے کی پلاننگ کی گئی ہے، اور قانون نافذ کرنے والے ادارے اس بات کی تحقیقات کر رہے ہیں کہ ایسے عناصر کی ٹریننگ کہاں اور کس جگہ دی جا رہی ہے۔

انہوں نے مزید کہا کہ یہ لوگ باہر کے اضلاع سے ایسے افراد منگوا رہے ہیں جن کی نقل و حرکت اور موجودگی کی اطلاع لاہور پولیس کو نہ ہو۔ ایک سوال کے جواب میں ڈی آئی جی آپریشنز کا کہنا تھا کہ پرامن احتجاج کرنا ہر پاکستانی شہری کا بنیادی اور آئینی حق ہے، لیکن پی ٹی آئی کا احتجاج اب پرامن زمرے میں نہیں آتا۔ ریاست اور اس کے ادارے اپنے شہریوں کے جان و مال اور امن عامہ کے تحفظ کے لیے تمام ضروری اقدامات اٹھا رہے ہیں۔ انہوں نے اعلان کیا کہ اس پورے نیٹ ورک کے خلاف کارروائی کا سلسلہ جاری ہے اور بہت جلد ایک اور اہم گرفتاری عمل میں لائی جائے گی۔