جڑواں شہروں میں موسلادھار بارش، نالہ لئی میں پانی کی سطح بلند اور ٹریفک معطل

اسلام آباد اور راولپنڈی سمیت ملک کے مختلف حصوں میں صبح سویرے سے موسلادھار بارش کا سلسلہ جاری ہے جس کے باعث موسم میں نمایاں تبدیلی اور سردی کی آمد کا آغاز ہو گیا ہے۔ بارش کے پیش نظر جڑواں شہروں میں ضلعی انتظامیہ، واسا، ریسکیو اور دیگر متعلقہ اداروں کو ہائی الرٹ کر دیا گیا ہے جبکہ نشیبی علاقوں میں پانی کی نکاسی کے لیے عملہ اور ہیوی مشینری تعینات کر دی گئی ہے۔

واسا حکام کے مطابق راولپنڈی میں بارش کے باعث رین ایمرجنسی نافذ کی گئی ہے اور تمام فیلڈ افسران کو متحرک کر دیا گیا ہے۔ نالہ لئی میں پانی کی مسلسل مانیٹرنگ کی جا رہی ہے جہاں نیو کٹاریاں اور گوالمنڈی کے مقامات پر پانی کی سطح 10 فٹ تک پہنچنے کی اطلاعات موصول ہوئی ہیں۔ لیاقت باغ، کمیٹی چوک انڈر پاس، مری روڈ، ڈھوک کھبہ، سرکلر روڈ اور صادق آباد کے نشیبی علاقوں میں ڈی واٹرنگ پمپس اور ضروری مشینری پہنچا دی گئی ہے۔ دوسری جانب اسلام آباد کے مختلف علاقوں میں بھی نشیبی مقامات پر نکاسی آب کے لیے اضافی عملہ تعینات کیا گیا ہے جبکہ اسسٹنٹ کمشنرز خود نالوں کی نگرانی کر رہے ہیں۔

اسلام آباد کی ایکسپریس ہائی وے پر بارش کے باعث ٹریفک کی روانی شدید متاثر ہوئی ہے اور گاڑیوں کی طویل قطاریں لگنے سے شہری کئی گھنٹوں تک پھنسے رہے۔ مسافروں کے مطابق اس دوران ٹریفک پولیس کے اہلکار موقع پر نظر نہیں آئے جس سے مشکلات میں مزید اضافہ ہوا۔ علاوہ ازیں، ملک کے دیگر شہروں بشمول کوہاٹ، کرک، میانوالی، دنیا پور، جھنگ، چشمہ دریا خان اور کندیاں میں بھی تیز ہواؤں کے ساتھ بارش ہوئی ہے جہاں کندیاں میں بارش کا پانی گھروں میں داخل ہو گیا اور گلی محلے تالاب کا منظر پیش کرنے لگے۔ متعدد علاقوں میں فیڈر ٹرپ ہونے سے بجلی کی سپلائی بھی معطل ہو گئی ہے۔

نیشنل ہائی ویز اینڈ موٹروے پولیس کے ترجمان کے مطابق موٹروے ایم ون اسلام آباد تا پشاور دونوں اطراف سے ہر قسم کی ٹریفک کے لیے بحال کر دی گئی ہے، جبکہ جی ٹی روڈ این فائیو بھی ٹریفک کے لیے مکمل بحال ہے۔ تاہم، موٹروے ایم 14 ہکلہ تا کنڈل اور ایم ون سے ہزارہ موٹروے کو ملانے والے لوپ پر بحالی کا کام تاحال جاری ہے۔ ترجمان موٹروے پولیس نے شہریوں کو ہدایت کی ہے کہ وہ غیر ضروری سفر سے گریز کریں، گاڑیوں کی رفتار کم رکھیں اور دورانِ ڈرائیونگ موبائل فون کے استعمال سے اجتناب برتیں۔ کسی بھی ہنگامی صورتحال یا معلومات کے لیے شہری ہیلپ لائن 130 پر رابطہ کر سکتے ہیں۔