یمنی فوج کی کارروائیاں، 3 دن میں 2300 سے زائد حوثی جنگجو ہلاک و زخمی

یمن کی بین الاقوامی طور پر تسلیم شدہ حکومت کی فوج نے دعویٰ کیا ہے کہ گزشتہ 72 گھنٹوں کے دوران حوثی جنگجوؤں کے خلاف کی جانے والی شدید کارروائیوں میں 2,316 حوثی ہلاک یا زخمی ہوئے ہیں۔ یمنی فوج کے ترجمان کے مطابق اس 3 روزہ عرصے کے دوران مجموعی طور پر 756 فوجی کارروائیاں اور حملے کیے گئے۔

دستاویزات اور سرکاری بیانات کے مطابق یہ کارروائیاں 8 مختلف محاذوں پر کی گئیں، جن میں تعز، لحج، مأرب، الجوف، البیضاء، کتاف، البقع اور العلب کے علاقے شامل ہیں۔ فوجی حکام کا کہنا ہے کہ ان کارروائیوں کے دوران حوثیوں کی متعدد فوجی گاڑیوں، اسلحہ ڈپو، میزائل لانچنگ پلیٹ فارمز اور دیگر اہم تنصیبات کو کامیابی سے نشانہ بنایا گیا۔

عرب میڈیا اور یمنی فوج کے جاری کردہ بیانات میں مزید بتایا گیا کہ تعز کے محاذ پر ہونے والی کارروائیوں میں ایرانی ڈرون اور میزائل آپریشنز سے وابستہ 4 ماہرین بھی مارے گئے ہیں۔ سرکاری فوج کی جانب سے تعز، مارب اور الحدیدہ کے علاقوں میں حوثی ملیشیا کے ٹھکانوں پر زمینی اور فضائی حملے تاحال جاری ہیں۔