معروف یوٹیوبر رجب بٹ نے کوئی مالی مدد نہیں کی، ایزل کی والدہ کا بیان

لاہور (نیوز ڈیسک) معروف یوٹیوبر رجب بٹ کی جانب سے مالی امداد کیے جانے سے متعلق گردش کرنے والی تمام خبریں بے بنیاد ثابت ہو گئی ہیں۔ انصاف کے حصول کے لیے احتجاج کرنے والی بچی ایزل کی والدہ نے واضح کیا ہے کہ یوٹیوبر رجب بٹ نے ان کی ایک روپے کی بھی مالی مدد نہیں کی، بلکہ وہ صرف وی لاگ بنانے آئے تھے۔

دستیاب اطلاعات کے مطابق رجب بٹ نے حال ہی میں بچوں سے متعلق اپنے ایک متنازع بیان پر شدید عوامی تنقید کے بعد معافی مانگی تھی، جس کے بعد وہ ایزل کی والدہ سے ملاقات کے لیے پہنچے تھے۔ اس ملاقات کے بعد سوشل میڈیا پر یہ افواہیں تیزی سے پھیل گئی تھیں کہ یوٹیوبر نے متاثرہ خاندان کی مالی معاونت کی ہے۔

تاہم، ایزل کی والدہ نے میڈیا سے گفتگو کرتے ہوئے ان تمام دعوؤں کی سختی سے تردید کی ہے۔ ان کا کہنا تھا کہ رجب بٹ نے ملاقات کے آغاز ہی میں واضح کر دیا تھا کہ وہ اس معاملے پر وی لاگ بنانا چاہتے ہیں، جس پر انہیں اجازت دی گئی تھی۔ انہوں نے مزید کہا کہ رجب بٹ نے مالی طور پر کوئی تعاون نہیں کیا، البتہ انہوں نے اپنی شہرت اور پلیٹ فارم کا استعمال کرتے ہوئے اس معاملے پر آواز ضرور بلند کی ہے، جس پر وہ ان کی قدر کرتی ہیں۔

اس کے علاوہ ایزل کی والدہ نے فلاحی ادارے جے ڈی سی کی جانب سے کسی بھی قسم کی مالی مدد ملنے کی اطلاعات کی بھی تردید کی ہے۔ اس تازہ بیان کے سامنے آنے کے بعد سوشل میڈیا صارفین کی جانب سے رجب بٹ پر ایک بار پھر تنقید کا سلسلہ شروع ہو گیا ہے۔