بلوچستان اور خیبرپختونخوا میں سکیورٹی فورسز کی کارروائیاں،4 دہشت گرد ہلاک
کارروائی کے دوران ہلاک دہشت گردوں کے قبضے سے بڑی مقدار میں اسلحہ اور گولہ بارود برآمد ہوا
شمالی وزیرستان میں سیکیورٹی فورسز کی کارروائی، 3 خوارج ہلاک
بلوچستان اور خیبرپختونخوا میں سکیورٹی فورسز کی مختلف کارروائیوں کے دوران 4 دہشت گرد ہلاک ہوگئے۔
سکیورٹی ذرائع کے مطابق بلوچستان کے ضلع سہراب کے علاقے مال مدرسہ کے قریب دہشت گردوں کی موجودگی کی اطلاع پر کارروائی کی گئی۔ آپریشن ردالفتنہ 3 کے تحت ہونے والی کارروائی کے دوران سکیورٹی فورسز اور دہشت گردوں کے درمیان فائرنگ کا تبادلہ ہوا، جس میں ایک دہشت گرد مارا گیا جبکہ دوسرا فرار ہوگیا۔
ذرائع کے مطابق ہلاک دہشت گرد کے قبضے سے اسلحہ اور موٹر سائیکل بھی برآمد ہوئی ہے۔
دوسری جانب خیبرپختونخوا کے شمالی وزیرستان میں بھی سکیورٹی فورسز نے انٹیلی جنس معلومات کی بنیاد پر کارروائی کی۔ میر علی کے علاقے میں ہونے والے آپریشن کے دوران 3 دہشت گرد ہلاک کیے گئے۔
سکیورٹی ذرائع کا کہنا ہے کہ کارروائی کے دوران ہلاک دہشت گردوں کے قبضے سے بڑی مقدار میں اسلحہ اور گولہ بارود برآمد ہوا۔ میر علی اور گردونواح میں دہشت گردوں کے مبینہ ٹھکانوں کو بھی نشانہ بنایا گیا۔
ذرائع کے مطابق سکیورٹی فورسز نے میر علی بازار کے قریب راشن سے لدے ٹرک کو روکنے کی دہشت گردوں کی کوشش بھی ناکام بنا دی۔
سکیورٹی فورسز کا کہنا ہے کہ ملک سے دہشت گردی کے خاتمے اور پائیدار امن کے قیام کے لیے کارروائیاں جاری رہیں گی۔