وزیراعظم شہباز شریف اقوام متحدہ کا دورہ مکمل کرکے وطن واپس پہنچ گئے

اسلام آباد: وزیراعظم محمد شہباز شریف اقوام متحدہ کی جنرل اسمبلی کے 81ویں اجلاس میں شرکت کے بعد وطن واپس پہنچ گئے۔ اسلام آباد ایئرپورٹ پر وفاقی وزرا اور دیگر حکام نے ان کا استقبال کیا۔

وزیراعظم کی آمد پر وفاقی وزیر داخلہ محسن نقوی، وفاقی وزیر اطلاعات و نشریات عطا اللہ تارڑ اور وزیر مملکت برائے داخلہ طلال چوہدری موجود تھے۔

دورہ اقوام متحدہ کے دوران وزیراعظم شہباز شریف نے جنرل اسمبلی کے اجلاس سے خطاب کرتے ہوئے عالمی برادری کے سامنے پاکستان کا مؤقف پیش کیا۔ اپنے خطاب میں انہوں نے امن، سلامتی، پائیدار ترقی اور بین الاقوامی تعاون سے متعلق پاکستان کے نقطہ نظر کو اجاگر کیا۔

وزیراعظم نے دورے کے دوران مختلف ممالک کے سربراہان، رہنماؤں اور اعلیٰ حکام سے ملاقاتیں بھی کیں، جن میں دوطرفہ تعلقات، علاقائی صورتحال اور باہمی دلچسپی کے امور پر تبادلہ خیال کیا گیا۔

شہباز شریف نے عالمی مالیاتی اداروں کے نمائندوں اور کاروباری شخصیات سے بھی ملاقاتیں کیں۔ ان ملاقاتوں میں پاکستان میں سرمایہ کاری کے فروغ، معاشی تعاون میں اضافے اور ملکی معیشت سے متعلق مختلف امور پر گفتگو ہوئی۔