پاکستان، سری لنکا اور انگلینڈ کے درمیان سہ ملکی ون ڈے سیریز کیلئے 16 رکنی اسکواڈ کا اعلان

کولمبو (نیوز ڈیسک) سری لنکا نے پاکستان اور انگلینڈ کے خلاف کھیلی جانے والی آئندہ ون ڈے سہ ملکی سیریز کے لیے 16 رکنی اسکواڈ کا باضابطہ اعلان کر دیا ہے۔ اس سیریز کے تمام مقابلے 18 اکتوبر سے 31 اکتوبر تک پاکستان کے شہروں راولپنڈی اور لاہور میں منعقد ہوں گے۔

ذرائع کے مطابق اعلان کردہ اسکواڈ میں اویشکا فرنینڈو کی طویل عرصے بعد ٹیم میں واپسی ہوئی ہے جو فروری 2025 کے بعد پہلی بار ون ڈے میچ کھیلیں گے۔ اوپنر اویشکا فرنینڈو کو چارتھ اسالنکا کی جگہ اسکواڈ میں شامل کیا گیا ہے۔ انہوں نے حالیہ ڈومیسٹک کرکٹ میں شاندار کارکردگی کا مظاہرہ کرتے ہوئے 3 میچز میں 2 سنچریاں اسکور کیں جن میں ان کا بہترین اسکور 160 رنز رہا۔ وہ میجر کلبز لمیٹڈ اوور ٹورنامنٹ میں 447 رنز کے ساتھ سب سے زیادہ رنز بنانے والے بیٹر بھی ہیں۔

ٹیم کی قیادت کوشل مینڈس کے سپرد کی گئی ہے جبکہ نائب کپتان کا اعلان ابھی باقی ہے۔ اس کے علاوہ انگلینڈ کے خلاف سیریز کھیلنے والی ٹیم میں زیادہ تبدیلیاں نہیں کی گئیں اور زخمی ونیندو ہسرنگا کی جگہ سہان آراچیگے کو برقرار رکھا گیا ہے۔ سری لنکن اسکواڈ میں پاتھم نسانکا، اویشکا فرنینڈو، کمیل مشرا، کوشل مینڈس، پون رتھنائیکے، سہان آراچیگے، کامندو مینڈس، جینتھ لیانگے، داسن شناکا، دونیتھ ویلالاگے، مہیش تھیکشنا، سچندو کولمبیج، دشمنتھا چمیرا، اسیتھا فرنینڈو، دلشان مدوشنکا اور ایشان مالنگا شامل ہیں۔

یاد رہے کہ سہ ملکی سیریز کا افتتاحی میچ 18 اکتوبر کو راولپنڈی میں پاکستان اور سری لنکا کے درمیان کھیلا جائے گا جبکہ ٹورنامنٹ کا فائنل 31 اکتوبر کو لاہور کے قذافی اسٹیڈیم میں شیڈول ہے۔