گاڑی کی یوایس بی پورٹ سے موبائل فون سست چارج کیوں ہوتاہے؟

سفر کے دوران اگر اسمارٹ فون کی بیٹری ختم ہونے کے قریب پہنچ جائے تو عام طور پر گاڑی میں موجود یو ایس بی پورٹ سے ڈیوائس کو چارج کیا جاتا ہے، تاہم یہ بات اکثر پریشانی کا باعث بنتی ہے کہ گاڑی کی یو ایس بی پورٹ سے فون کی چارجنگ انتہائی سست روی کا شکار کیوں رہتی ہے۔ ماہرین کے مطابق فون کی چارجنگ اسپیڈ کا انحصار بنیادی طور پر وولٹیج، ایمپئرز اور واٹس پر ہوتا ہے، اور چارجر جتنی زیادہ پاور فراہم کرے گا، عموماً فون اتنی ہی تیزی سے چارج ہوگا، بشرطیکہ فون بھی اس پاور کو سپورٹ کرتا ہو۔

موجودہ دور کے بیشتر فون چارجرز عموماً 5 سے 9 وولٹ کے درمیان پاور فراہم کرتے ہیں، جبکہ روایتی گھریلو بجلی کے آؤٹ لیٹ سے کہیں زیادہ وولٹیج دستیاب ہوتا ہے، تاہم فون براہِ راست گھریلو وولٹیج پر چارج نہیں ہوتا بلکہ چارجر اسے فون کے لیے موزوں وولٹیج اور پاور میں تبدیل کرتا ہے۔ اس کے برعکس گاڑیوں میں نصب پرانی یو ایس بی اے پورٹس اکثر محدود کرنٹ فراہم کرتی ہیں، جس کے باعث فون کی چارجنگ اسپیڈ کم رہتی ہے۔ ماہرین کے مطابق بعض گاڑیوں کی یو ایس بی پورٹس سے تقریباً 0.5 ایمپیئر تک کرنٹ دستیاب ہوتا ہے، جو جدید اسمارٹ فونز کی تیز رفتار چارجنگ کے لیے ناکافی ہے۔

یو ایس بی سی ٹیکنالوجی نے اس صورتحال میں کسی حد تک بہتری پیدا کی ہے، کیونکہ یہ پرانی ٹیکنالوجی کے مقابلے میں زیادہ پاور اور تیز چارجنگ کی صلاحیت رکھتی ہے۔ تاہم یو ایس بی سی پورٹ ہونے کے باوجود اگر گاڑی کی پورٹ محدود واٹ فراہم کرتی ہو تو فون تیزی سے چارج نہیں ہوسکتا۔ آسان الفاظ میں گاڑی کی یو ایس بی پورٹ سے فون کی سست چارجنگ کی بنیادی وجہ محدود پاور سپلائی ہے، یہی وجہ ہے کہ بعض اوقات گاڑی میں فون کئی گھنٹے منسلک رہنے کے باوجود بیٹری مکمل طور پر چارج نہیں ہو پاتی۔ ماہرین کا مشورہ ہے کہ اگر گاڑی میں تیز چارجنگ کے لیے مناسب یو ایس بی سی پورٹ موجود نہ ہو تو زیادہ پاور فراہم کرنے والا کار چارجر استعمال کرنا فون کو نسبتاً تیزی سے چارج کرنے کا بہترین طریقہ ہوسکتا ہے۔