لاہور میں اے ٹی ایم سے چھیڑ چھاڑ کرکے رقم چرانے والا3رکنی گینگ گرفتار

لاہور کے علاقے وحدت کالونی میں اے ٹی ایم مشینوں سے چھیڑ چھانی کے ذریعے شہریوں کی رقوم ہتھیانے والے 3 رکنی جعل ساز گینگ کو پولیس نے جدید ٹیکنالوجی کی مدد سے ٹریس کر کے چونیاں سے گرفتار کر لیا ہے۔ گرفتار ہونے والے تمام ملزمان کا تعلق میٹرک فیل افراد سے ہے جنہوں نے دوران تفتیش گذشتہ ایک سال کے دوران شہر کے مختلف علاقوں میں 12 سے زائد وارداتیں کرنے کا اعتراف کیا ہے۔

پولیس کے مطابق ملزمان واردات کے لیے انتہائی مکروہ اور انوکھا طریقہ کار استعمال کرتے تھے۔ اے ٹی ایم کیبن کے اندر موجود ملزم مشین میں کارڈ پھنس جانے کا ڈراما رچاتا تھا جبکہ اس کے دو ساتھی باہر کھڑے ہو کر نوسربازی کے ذریعے متاثرہ شہریوں کو الجھاتے تھے۔ پولیس ریکارڈ کے مطابق ملزمان اے ٹی ایم مشین کا لینگویج موڈ تبدیل کر دیتے تھے جس کی وجہ سے سسٹم کو بحال ہونے میں 10 منٹ سے زائد کا وقت لگ جاتا تھا اور اس دوران رقوم نکالنے کی کوشش کرنے والے سادے لوح شہریوں کے کارڈ مشین میں پھنس جاتے تھے۔

تھانہ وحدت کالونی میں درج مقدمے کے متن کے مطابق ملزمان نے ایک بزرگ خاتون کے ساتھ نوسربازی کرتے ہوئے ان کے اکاؤنٹ سے 19 ہزار روپے غیر قانونی طور پر نکلوا لیے تھے۔ بزرگ خاتون کی مدحت پر درج کی جانے والی اس درخواست کے بعد پولیس نے تفتیش کا دائرہ کار وسیع کیا اور کھوج لگاتے ہوئے چونیاں تک رسائی حاصل کی۔ پولیس حکام کا کہنا ہے کہ گرفتار ملزمان سے مزید تفتیش کا عمل جاری ہے جس کے دوران مزید اہم انکشافات اور متعدد وارداتوں کے سامنے آنے کا قوی امکان ہے۔