بشریٰ بی بی کی سزا معطلی کی درخواست پر سماعت مکمل، عدالت کا تحریری دلائل جمع کرانے کا حکم

وفاقی آئینی عدالت میں بشریٰ بی بی کی سزا معطلی سے متعلق درخواست پر سماعت مکمل ہوگئی۔ چیف جسٹس امین الدین خان کی سربراہی میں دو رکنی بینچ نے کیس کی سماعت کی، جس کے دوران بشریٰ بی بی کے وکیل سلمان صفدر نے دلائل پیش کیے۔ سلمان اکرم راجہ بھی اس موقع پر کمرہ عدالت میں موجود تھے۔

سماعت کے دوران سلمان صفدر نے مؤقف اختیار کیا کہ عدالتوں میں خواتین کے مقدمات پر ہمیشہ نرم رویہ اختیار کیا جاتا رہا ہے۔ ان کا کہنا تھا کہ گزشتہ 13 ماہ کے دوران قومی احتساب بیورو (نیب) کا طرزِ عمل قابل اعتراض رہا اور ادارے کی جانب سے متعدد سماعتوں پر التوا بھی لیا گیا۔

وکیل نے عدالت کو بتایا کہ نیب نے سزا معطلی کی درخواست پر بھی اعتراض اٹھایا۔ ان کے مطابق سزا سنائے جانے کے بعد بشریٰ بی بی کی ضمانت اور سزا معطلی کے لیے قانونی بنیاد موجود ہے۔ انہوں نے مزید کہا کہ مقدمے کی کارروائی کے دوران زیادہ توجہ بانی پی ٹی آئی کی اپیل پر مرکوز رہی۔

چیف جسٹس امین الدین خان نے ریمارکس دیے کہ اس مرحلے پر مقدمے کے میرٹ میں جانے کے بجائے عدالت کے سامنے موجود سزا معطلی کی درخواست پر توجہ دی جائے۔

اس موقع پر جسٹس باقی نجفی نے استفسار کیا کہ مرکزی اپیل اب تک کتنی مرتبہ سماعت کے لیے مقرر ہو چکی ہے۔

بعد ازاں عدالت نے درخواست پر سماعت مکمل کرتے ہوئے سلمان صفدر کو ہدایت کی کہ وہ اپنے دلائل کے اہم نکات تحریری صورت میں جمع کرائیں۔ چیف جسٹس امین الدین خان نے کہا کہ عدالتی حکم کا انتظار کیا جائے۔