اوپننگ کھلاڑی حفیظ شیخ کو کچھ ٹارگٹس دیے گئے ہیں،فردوس عاشق اعوان

اسلام آباد : ڈاکٹر فردوس عاشق اعوان نے کہا کہ ہمارے اوپننگ کھلاڑی حفیظ شیخ کو کچھ ٹارگٹس دیے گئے ہیں جبکہ معاشی ٹیم کو معاشی بحران اور مہنگائی سے نمٹنے کا ٹارگٹ دیا گیا ہے.

بنی گالہ میں عمران خان کی زیر صدارت ہونے والے اہم اجلاس کے بعد میڈیا کو بریفنگ دیتے ہوئے ڈاکٹر فردوس عاشق اعوان نے کہا کہ  مختلف وزارتوں کو مختلف ٹارگٹ دیے گئے ہیں تاکہ رمضان میں لوڈ شیڈنگ اور اشیائے ضروریہ کی قیمتوں کے حوالے سے صوبوں کے ساتھ مل کر جوائنٹ سٹریٹجی اپنائی جائے۔

’کیا آپ کا رویہ بھی اپوزیشن کے ساتھ فواد چوہدری جیسا ہوگا‘ اس سوال کے جواب میں ڈاکٹر فردوس عاشق اعوان نے کہا کہ اپوزیشن کے بغیر پارلیمنٹ چل نہیں سکتی ، انہیں ساتھ لے کر چلیں گے اور اگر ان کے پاس مثبت تجاویز ہیں تو انہیں سنا جائے گا لیکن اپوزیشن کو بھی اپنا کردار ذمہ داری سے ادا کرنا ہے ۔ اگر وہ پارلیمنٹ کو ہائی جیک کریں گے اور قانون سازی نہیں ہونے دیں گے تو مسائل پیدا ہوں گے۔