’’لے چلا جان مری روٹھ کے جانا تیرا‘‘

کراچی میں لائنز ایریا کے رہائشی نوجوان نے بیوی کے ناراض ہوکر میکے جانے پر خودکشی کرلی۔
پولیس کے مطابق لائنز ایریا میں ایک نوجوان کی پھندا لگی لاش ملی جسے چھیپا ایمبولینس کے ذریعے جناح اسپتال منتقل کردیا گیا جہاں نوجوان کی شناخت 27 سالہ نوید بیگ ولد ادریس کے نام سے ہوئی ہے۔
ایس ایچ او محمد سعید نے بتایا کہ نوید پیپر کٹنگ کا کام کرتا تھا اور 7 ماہ قبل پسند کی شادی کی تھی، شادی کے بعد ہی میاں بیوی میں جھگڑے شروع ہوگئے تھے جس کے باعث نوید نے 3 ماہ قبل چوہے مار دوا کھا کر اور 4 روز قبل پھندا لگا کر خودکشی کی کوشش کی تاہم اس کی جان بچ گئی۔
ایس ایچ او کے مطابق نوید کی بیوی ان دنوں ناراض ہو کر میکے گئی ہوئی تھی جس پر آج نوید نے گھر کے ساتھ بنے کارخانے میں دروازے پر کنڈی لگاکر خود کشی کرلی، پولیس نے ضابطے کی کارروائی کے بعد نوجوان کی لاش ورثا کے حوالے کردی ہے۔

داغ دہلوی نے شاید ایسے ہی جذبات کا اظہار اپنے ایک شعر میں کیا ہے کہ ’’لے چلا جان مری روٹھ کے جانا تیرا‘‘،’’ایسے آنے سے تو بہتر تھا نہ آنا تیرا‘‘