کراچی : دہشت گردوں کی فائرنگ،مدرسہ کے معلم و شاگرد سمیت 3 زخمی

کراچی: نارتھ ناظم آباد میں نامعلوم دہشت گردوں کی فائرنگ سے مدرسہ کے معلم اور طالب علم سمیت 3 افراد زخمی ہوگئے ۔پولیس کا کہنا ہے کہ واقعہ چھینا جھپٹی کا نہیں ہے تاہم پولیس اس حوالے سے مزید معلومات حاصل کر رہی ہے ۔ تفصیلات کے مطابق نارتھ ناظم آباد بلاک این کرسٹل شادی ہال کے قریب فائرنگ کے واقعہ میں 3 افراد زخمی ہوگئے جنھیں فوری طور پر عباسی شہید اسپتال لے جایا گیا جہاں زخمیوں کی شناخت 42 سالہ مولانا حافظ خرم شہزاد ، 20 سالہ مدنی اور 40 سالہ نوید کے نام سے کی گئی۔

شدید زخمی مولانا حافظ خرم شہزاد کو سر اور بغل کے قریب گولیاں لگی تھیں اور انھیں انتہائی تشویشناک حالت میں جناح اسپتال منتقل کر دیا گیا۔اس حوالے سے ایس ایچ او تیموریہ فیصل رفیق نے بتایا کہ زخمی ہونے والے نوید اور مدنی نے پولیس کو ابتدائی بیان میں بتایا کہ وہ کھارادر سے شادی کی تقریب میں شرکت کے لیے آئے تھے اور واپس جا رہے تھے کہ نامعلوم ملزمان نے فائرنگ کا نشانہ بنایا جبکہ مولانا حافظ خرم مدرسے کے معلم ہیں۔پولیس کا کہنا ہے کہ واقعہ چھینا جھپٹی کا نہیں ہے تاہم پولیس اس حوالے سے مزید معلومات حاصل کر رہی ہے ۔