آزاد کشمیر میں عام انتخابات کی تاریخ کا اعلان،الیکشن شیڈول بھی جاری

الیکشن کمیشن آزاد کشمیر نے آزاد کشمیر میں عام انتخابات 27 جولائی 2026 کو کرانے کا نوٹیفکیشن جاری کر دیا ہے۔

جاری نوٹیفکیشن کے مطابق آزاد کشمیر قانون ساز اسمبلی کے تمام حلقوں میں پولنگ 27 جولائی 2026 کو صبح 8 بجے سے شام 5 بجے تک ہوگی۔

شیڈول کے مطابق امیدوار 9 جون سے 19 جون 2026 تک ریٹرننگ افسران کے پاس اپنے کاغذاتِ نامزدگی جمع کرا سکیں گے۔ کاغذاتِ نامزدگی کی جانچ پڑتال 20 جون کو ہوگی جبکہ درست قرار دیے گئے امیدواروں کی ابتدائی فہرست بھی اسی روز جاری کی جائے گی۔

کاغذاتِ نامزدگی کی منظوری یا مسترد ہونے کے خلاف اپیلیں 21 جون سے 24 جون تک الیکشن کمیشن میں دائر کی جا سکیں گی۔ اپیلوں کی سماعت 26 اور 27 جون کو ہوگی جبکہ فیصلے 28 اور 29 جون تک سنائے جائیں گے۔

شیڈول کے مطابق امیدوار 30 جون تک اپنے کاغذات واپس لے سکیں گے، جبکہ انتخابی میدان میں موجود امیدواروں کی فہرست یکم جولائی کو جاری کی جائے گی۔ 2 جولائی کو انتخابی نشانات الاٹ کیے جائیں گے اور اسی روز انتخابی نشانات سمیت امیدواروں کی حتمی فہرست بھی شائع کر دی جائے گی۔

الیکشن کمیشن کا کہنا ہے کہ یہ نوٹیفکیشن فوری طور پر نافذ العمل ہوگا اور عام انتخابات کے انعقاد کے لیے تمام انتظامات شیڈول کے مطابق مکمل کیے جائیں گے۔

یاد رہے کہ گزشتہ روز آزاد کشمیر کی قانون ساز اسمبلی نے کشمیری مہاجرین کی 12 نشستیں برقرار رکھنے کی قرارداد منظور کی تھی۔

آزاد کشمیر قانون ساز اسمبلی کی جانب سے منظور کردہ قرارداد میں کہا گیا کہ مہاجرین کی نمائندگی تاریخی اور آئینی حقیقت ہے۔ قرارداد کے مطابق انتخابی پیچیدگیاں دور کرنے اور سیاسی جماعتوں کے لیے قابل قبول بنانے کے لیے ضروری اصلاحات اسمبلی کے ذریعے عمل میں لائی جا سکتی ہیں۔

قرارداد میں مزید کہا گیا کہ آئینی اصلاحات عوام کے منتخب نمائندوں کا خصوصی اختیار اور مینڈیٹ ہیں، اس لیے اصلاحات کا معاملہ قانون ساز اسمبلی پر چھوڑا جائے اور سیاسی جماعتوں، بار ایسوسی ایشنز، بار کونسل، سول سوسائٹی اور آئینی ماہرین سے مشاورت کی جائے۔