امریکہ ایران معاہدے پر دستخط جی سیون اجلاس کے موقع پر متوقع

ایرانی وزارت خارجہ کے ذرائع نے تصدیق کی ہے کہ امریکہ اور ایران کے درمیان مجوزہ معاہدے پر دستخط جی سیون سربراہی اجلاس کے موقع پر ہونے کا امکان ہے۔
جی سیون ممالک کا اہم اجلاس فرانس کے شہر ایویان میں 15 سے 17 جون کے درمیان منعقد ہو رہا ہے، جس میں عالمی رہنما شریک ہوں گے۔ ایرانی وزارت خارجہ کے ایک سینیئر اہلکار نے نام ظاہر نہ کرنے کی شرط پر بتایا کہ اگر امن عمل متاثر نہ ہوا تو معاہدے پر دستخط ممکنہ طور پر 14 جون کو کیے جا سکتے ہیں۔
ذرائع کے مطابق معاہدے کے لیے جنیوا کو حتمی مقام کے طور پر زیر غور رکھا گیا ہے، جبکہ ایران کی نمائندگی چیف مذاکرات کار اور وزیر خارجہ عباس عراقچی کریں گے۔ امریکی وفد کی قیادت نائب صدر جے ڈی وینس، خصوصی نمائندہ اسٹیو وٹکوف اور سابق صدر کے داماد جیرڈ کشنر کے کرنے کی توقع ہے۔
مزید بتایا گیا ہے کہ پاکستان کی وزارت خارجہ کا اعلیٰ سطح وفد بھی اس عمل میں بطور ثالث شریک ہوگا۔
اجلاس کے دوران برطانیہ اور فرانس کی جانب سے آبنائے ہرمز میں مبینہ بارودی سرنگوں کی صفائی کے لیے یورپی قیادت میں ایک سیکیورٹی منصوبہ پیش کیے جانے کا امکان بھی ہے، جس کے لیے امریکی صدر کی توثیق درکار ہوگی۔
ایران نے ان دعوؤں کی تردید کی ہے کہ اس نے آبنائے ہرمز میں بارودی سرنگیں نصب کی ہیں، جبکہ جی سیون اجلاس کی میزبانی اس بار فرانس کر رہا ہے اور یورپی یونین کے اعلیٰ رہنما بھی اجلاس میں شریک ہوں گے۔