میکسیکو،ورلڈ کپ کی جیت کا جشن،بھگدڑ سے 3 افراد زندگی ہار گئے

میکسیکو سٹی: فیفا ورلڈ کپ کے پری کوارٹر فائنل میں تاریخی کامیابی کا جشن اس وقت افسوسناک واقعے میں بدل گیا جب جشن کے دوران بھگدڑ اور شدید رش کے باعث تین افراد جان کی بازی ہار گئے۔

میکسیکو نے راؤنڈ آف 32 کے مقابلے میں ایکواڈور کو 2-0 سے شکست دے کر تقریباً چار دہائیوں بعد پری کوارٹر فائنل میں جگہ بنائی، جس کے بعد ملک بھر میں لاکھوں شائقین جشن منانے کے لیے سڑکوں پر نکل آئے۔

شہری انتظامیہ کے مطابق دارالحکومت میں بڑی تعداد میں لوگ مرکزی یادگار کے اطراف جمع ہوئے، جہاں جشن، آتش بازی اور مختلف تقریبات کا سلسلہ رات گئے تک جاری رہا۔

ایمرجنسی حکام نے بتایا کہ رش اور بھگدڑ کے دوران کئی افراد کی طبیعت خراب ہوئی۔ تین افراد کو بے ہوشی کی حالت میں اسپتال منتقل کیا گیا، تاہم وہ جانبر نہ ہو سکے۔ محکمہ صحت کے مطابق جاں بحق افراد میں ایک 19 سالہ نوجوان خاتون، ایک 48 سالہ خاتون اور ایک 44 سالہ مرد شامل ہیں۔

میکسیکو سٹی کی میئر نے واقعے پر گہرے دکھ اور افسوس کا اظہار کرتے ہوئے متاثرہ خاندانوں سے تعزیت کی اور ہر ممکن تعاون کی یقین دہانی کرائی۔ انہوں نے شہریوں سے اپیل کی کہ عوامی تقریبات اور جشن کے مواقع پر احتیاط، ذمہ داری اور دوسروں کے تحفظ کو ہمیشہ ترجیح دی جائے۔