امریکی حملوں کا بھرپور جواب دیا جائے گا، ایران کا اعلان

ایران کے خاتم الانبیا مرکزی ہیڈکوارٹر نے کہا ہے کہ ملک کی مسلح افواج امریکی حملوں کا مؤثر اور فیصلہ کن جواب دینے کے لیے تیار ہیں۔

جاری بیان میں کہا گیا کہ امریکہ کی حالیہ فوجی کارروائیاں جارحیت اور دہشت گردی کے زمرے میں آتی ہیں، جن کا مناسب وقت پر جواب دیا جائے گا۔

بیان میں آبنائے ہرمز کی اہمیت پر زور دیتے ہوئے کہا گیا کہ ایران اس حساس بحری گزرگاہ کے معاملات میں کسی بھی بیرونی مداخلت کو قبول نہیں کرے گا۔

ایرانی حکام کے مطابق آبنائے ہرمز سے گزرنے والے تجارتی اور تیل بردار جہازوں کے لیے وہی بحری راستے محفوظ تصور کیے جائیں گے جن کی نشاندہی ایران کی جانب سے کی جائے گی۔

یہ بیان ایسے وقت میں سامنے آیا ہے جب امریکی فوج کی مرکزی کمان نے ایران میں 80 سے زائد اہداف پر حملے کرنے کا دعویٰ کیا ہے۔ تاہم، اس حوالے سے دونوں ممالک کے مؤقف سامنے آ چکے ہیں اور آزاد ذرائع سے تمام دعوؤں کی مکمل تصدیق نہیں ہو سکی ہے۔