ہڑتال کی کال،لاہور میں 375 پٹرول پمپس پر فروخت معطل

پٹرولیم ڈیلرز ایسوسی ایشن کی جانب سے ہڑتال کی کال کے بعد لاہور میں ایندھن کی فراہمی متاثر ہونے کا امکان ظاہر کیا جا رہا ہے۔ ایسوسی ایشن کے مطابق ہڑتال کے دوران شہر کے بڑی تعداد میں پٹرول پمپس بند رہیں گے۔

لاہور پٹرولیم ڈیلرز ایسوسی ایشن کے صدر جہانزیب ملک نے بتایا کہ ہڑتال کے باعث شہر کے تقریباً 375 پٹرول پمپس فروخت بند رکھیں گے۔ تاہم انہوں نے واضح کیا کہ آئل مارکیٹنگ کمپنیوں کے زیرِ انتظام چلنے والے تقریباً 150 پٹرول پمپس معمول کے مطابق کھلے رہیں گے، جہاں شہری پٹرول اور ڈیزل حاصل کر سکیں گے۔

دوسری جانب متعلقہ حکام کا کہنا ہے کہ ایندھن کی صورتحال پر مسلسل نظر رکھی جا رہی ہے تاکہ شہریوں کو کسی بڑے بحران یا غیر ضروری مشکلات کا سامنا نہ کرنا پڑے۔

انتظامیہ نے شہریوں سے اپیل کی ہے کہ وہ غیر ضروری ذخیرہ اندوزی سے گریز کریں اور ضرورت کے مطابق ہی ایندھن حاصل کریں۔