سعودی عرب کو یورینیم افزودگی میں مدد ملے گی۔ٹرمپ نے جوہری معاہدے کی منظوری دے دی

امریکی صدر ڈونلڈ ٹرمپ نے سعودی عرب کے ساتھ ایک معاہدے کی باضابطہ منظوری دی ہے جو اسے سویلین جوہری پروگرام فراہم کرے گا اور ممکنہ طور پر مملکت میں یورینیم کی افزودگی کا دروازہ کھل جائے گا۔

وال سٹریٹ جرنل کے مطابق نیا معاہدہ 30 سال تک جاری رہے گا اور یہ امریکی کمپنیوں کو سعودی عرب کے جوہری ڈھانچے کی ترقی میں مرکزی کرداردینے کے لیے ڈیزائن کیا گیا ہے۔

نئے معاہدے کی ایک کلیدی شق کے تحت امریکی کمپنیاں سعودی عرب میں یورینیم افزودگی کی سہولت فراہم کریں گی۔ اگر امریکہ،سعودی مشترکہ مطالعہ اس بات کا تعین کرے تو ایسے اقدام کی تصدیق کی جائے گی۔

دریں اثنا روئٹرز نے بتایا ہے کہ ٹرمپ انتظامیہ جوہری توانائی ٹیکنالوجی کے اشتراک کے لیے سعودی عرب سے ایک معاہدہ کانگریس میں پیش کرنے کا ارادہ رکھتی ہے۔انتظامیہ چند دنوں میں کانگریس کو معاہدہ 123 کے نام سے معروف ایک دستاویز پیش کرے گی جس پر امریکی وزیرِ توانائی کرس رائٹ اور سعودی وزیرِ توانائی شہزادہ عبدالعزیز بن سلمان دستخط کریں گے۔

دونوں نے گذشتہ سال ریاض میں ایک ابتدائی معاہدے پر دستخط کیے تھے۔

یہ معاہدہ 1954 کے امریکی ایٹمی توانائی ایکٹ کے سیکشن 123 کا حوالہ دیتا ہے اور اس کے لیے ضروری ہے کہ وہ امریکی حکومت اور امریکی کمپنیوں کو مملکت میں موجود اداروں کے ساتھ کئی بلین ڈالر کی سول نیوکلیئر انڈسٹری تیار کرنے کی اجازت دیں۔