آزاد کشمیر انتخابات، وزیراعظم نے کامیاب امیدواروں کو مبارکباد دے دی

وزیراعظم شہباز شریف نے آزاد جموں و کشمیر قانون ساز اسمبلی کے انتخابات کے دوسرے مرحلے میں کامیاب ہونے والے امیدواروں کو مبارکباد دیتے ہوئے کہا ہے کہ انتخابی نتائج عوام کے اعتماد کی عکاسی کرتے ہیں۔

وزیراعظم نے اپنے بیان میں مسلم لیگ (ن) کے قائد نواز شریف اور کامیاب امیدواروں کو مبارکباد پیش کرتے ہوئے کہا کہ انتخابی مہم میں کارکنوں اور قیادت کی محنت کے مثبت نتائج سامنے آئے ہیں۔

انہوں نے کہا کہ آزاد کشمیر کے عوام نے اپنے ووٹ کے ذریعے جس اعتماد کا اظہار کیا ہے، وہ عوامی رائے کی اہمیت کو ظاہر کرتا ہے۔ ان کے مطابق انتخابی مہم کے دوران عوام سے کیے گئے وعدوں کو پورا کرنے کی کوشش کی جائے گی۔

شہباز شریف کا کہنا تھا کہ آزاد جموں و کشمیر کی ترقی، خوشحالی اور عوامی فلاح حکومت کی ترجیحات میں شامل ہے، جبکہ خطے میں ترقیاتی منصوبوں اور عوامی سہولیات کی بہتری کے لیے اقدامات جاری رکھے جائیں گے۔

وزیراعظم نے مزید کہا کہ انتخابات میں مختلف سیاسی جماعتوں کی شرکت جمہوری عمل کے تسلسل اور مضبوطی کی علامت ہے، اور ایسے انتخابی عمل سے جمہوری اداروں کو مزید استحکام ملتا ہے۔