گریڈ 20 کی افسر ڈاکٹر سبین افضل کو پمز میں تعینات کر دیا گیا

اسلام آباد میں صحت کے شعبے سے متعلق ایک اہم انتظامی فیصلے کے تحت گریڈ 20 کی افسر ڈاکٹر سبین افضل کو پاکستان انسٹی ٹیوٹ آف میڈیکل سائنسز (PIMS) میں تعینات کر دیا گیا ہے۔ اس سے قبل وہ وفاقی گورنمنٹ پولی کلینک (FGPC) میں جوائنٹ ایگزیکٹو ڈائریکٹر کے عہدے پر فرائض انجام دے رہی تھیں۔

سرکاری دستاویز کے مطابق وزارت قومی صحت، ضابطہ اور رابطہ کاری نے مجاز اتھارٹی (سیکرٹری وزارت قومی صحت) کی منظوری سے ڈاکٹر سبین افضل کی تعیناتی کا باضابطہ نوٹیفکیشن جاری کر دیا ہے۔ دستاویز کے متن کے مطابق ان کی یہ تعیناتی جوائنٹ ایگزیکٹو ڈائریکٹر (BPS-20) کے عہدے پر اٹیچمنٹ کی بنیاد پر کی گئی ہے جو فوری اثر کے ساتھ اور اگلے احکامات تک نافذ العمل ہوگی۔

ذرائع کا کہنا ہے کہ اس تقرری کا مقصد طبی اداروں میں انتظامی امور کو مزید بہتر بنانا اور پمز جیسے بڑے ہسپتال میں انتظامی ڈھانچے کو مستحکم کرنا ہے۔ وزارت کی جانب سے جاری کردہ نوٹیفکیشن کی کاپیاں متعلقہ حکام کو ارسال کر دی گئی ہیں تاکہ نئے تقرر کے تحت ذمہ داریوں کی منتقلی کا عمل فوری طور پر مکمل کیا جا سکے۔