کھیلوں کو سیاست سے الگ رکھیں، او سی اے صدر کی اپیل

اولمپک کونسل آف ایشیا کے صدر شیخ جون بن حماد آل ثانی نے ایشین گیمز میں شریک ممالک پر زور دیا ہے کہ کھیلوں کو سیاسی معاملات سے الگ رکھا جائے اور مقابلوں کا مرکز کھلاڑیوں کو بنایا جائے۔

ان کا یہ بیان ایشین گیمز کی ایک پرچم کشائی کی تقریب میں تائیوان کے حکومتی عہدیدار کی شرکت کے معاملے پر پیدا ہونے والے تنازع کے بعد سامنے آیا ہے۔

رپورٹس کے مطابق تائیوان کے وزیر کھیل اور سابق اولمپک بیڈمنٹن چیمپئن لی یانگ کو جمعے کے روز ابتدائی طور پر پرچم کشائی کی تقریب میں داخلے کی اجازت نہیں دی گئی۔ اس صورتحال پر تائیوان کے وفد نے احتجاج کرتے ہوئے تقریب میں شرکت نہ کرنے کا فیصلہ کیا۔

بعد میں لی یانگ کو تقریب میں داخل ہونے کی اجازت دے دی گئی، تاہم اس معاملے کے باعث پرچم کشائی کی تقریب اپنے مقررہ وقت سے ایک گھنٹے سے زیادہ تاخیر سے شروع ہوئی۔

او سی اے کے صدر شیخ جون بن حماد آل ثانی نے کہا کہ کھیلوں کی توجہ کھلاڑیوں پر ہونی چاہیے اور تمام ایتھلیٹس کو مساوی حقوق اور آزادی حاصل ہونی چاہیے۔

او سی اے کے ڈائریکٹر جنرل حسین المسلم نے بھی کہا کہ پرچم کشائی کی تقریب کھیلوں میں شریک افراد کے لیے منعقد کی گئی تھی، نہ کہ حکومتی وفود کے لیے۔

موجودہ ایشین گیمز میں ریکارڈ 43 کھیلوں کے مقابلے شامل ہیں، جن میں مجموعی طور پر 469 میڈل ایونٹس رکھے گئے ہیں۔ دوسری جانب منتظمین کو رہائش، آمدورفت اور دیگر انتظامی معاملات سے متعلق بعض مشکلات کا بھی سامنا ہے۔