عازمین حج کی سہولت کے لیے پاک حج ایپ میں جدید فیچرز متعارف

اسلام آباد (نیوز ڈیسک) وزارت مذہبی امور نے عازمین حج کی سہولت کو مزید بہتر بناتے ہوئے پاک حج ایپ میں متعدد نئے اور جدید فیچرز متعارف کرا دیے ہیں۔ جاری کردہ اعلامیے کے مطابق اب عازمین حج گھر بیٹھے اپنے پیکیج کے دورانیے اور رہائش کے انتخاب میں ترمیم کرنے کی مکمل سہولت سے استفادہ کر سکتے ہیں۔

نئے فیچرز کے تحت عازمین اب گھر بیٹھے ہی ٹو بیڈ، تھری بیڈ، فیملی روم یا شیئرنگ رہائش کا انتخاب کرنے کے مجاز ہوں گے۔ اس کے علاوہ لانگ حج پیکیج کو شارٹ یا شارٹ پیکیج کو لانگ پیکیج میں تبدیل کرنے کی سہولت بھی مہیا کر دی گئی ہے۔ وزارت کے مطابق عازمین پاک حج ایپ سے میڈیکل فٹنس سرٹیفکیٹ کا پرنٹ حاصل کر کے کسی مجاز ڈاکٹر سے تصدیق کرانے کے پابند ہیں، جسے بعد ازاں تصدیق کے بعد پاک حج ایپ یا حج پورٹل پر دوبارہ اپ لوڈ کرنا لازمی قرار دیا گیا ہے۔ سمندر پار پاکستانی بھی اپنے نزدیکی ڈاکٹر سے فٹنس سرٹیفکیٹ حاصل کر کے ایپ پر اپ لوڈ کرنے کے مجاز ہیں۔

اعلامیے میں مزید بتایا گیا ہے کہ کامیاب عازمین حج کو ہارڈشپ کوٹہ کے تحت اپنے محرم یا ہیلپر کی درخواست جمع کرانے کی سہولت بھی دی گئی ہے، جبکہ کسی ناگزیر مجبوری کی بناء پر حج درخواست کی منسوخی اور رقوم کی واپسی کا فیچر بھی متعارف کرا دیا گیا ہے۔ دریں اثنا، نیشنل آئی ٹی بورڈ کے ڈیجیٹل حج پورٹل کے ذریعے پرائیویٹ حج کی بکنگ کا عمل بھی تیزی سے جاری ہے۔ وزارت مذہبی امور نے واضح کیا ہے کہ ڈیجیٹل پورٹل سے باہر پرائیویٹ حج کی بکنگ یا ادائیگی کرنے کی سخت ممانعت ہے۔ پرائیویٹ حج سکیم کے تحت اب تک 26 ہزار درخواستیں موصول ہو چکی ہیں جبکہ عازمین کے لیے مزید 45 ہزار نشستیں تاحال دستیاب ہیں۔