ملائیشیا کے سابق وزیراعظم مہاتیر محمد کی اہلیہ 100 برس کی عمر میں انتقال کر گئیں

کوالالمپور (مانیٹرنگ ڈیسک) ملائیشیا کے طویل عرصے تک وزیراعظم رہنے والے ڈاکٹر مہاتیر محمد کی اہلیہ ڈاکٹر سیتی حسمہ محمد علی 100 برس کی عمر میں انتقال کر گئی ہیں۔ خبر رساں اداروں کے مطابق ڈاکٹر سیتی حسمہ محمد علی نے کوالالمپور کے نیشنل ہارٹ انسٹی ٹیوٹ میں صبح تقریباً 9 بج کر 20 منٹ پر آخری سانس لی۔ مہاتیر محمد کی اہلیہ کے انتقال پر ملائیشیا بھر میں صق و رنج کی لہر دوڑ گئی ہے اور مختلف سیاسی و سماجی شخصیات نے گہرے دکھ کا اظہار کیا ہے۔

دستاویزات اور دستیاب خـبروں کے مطابق سیتی حسمہ اور مہاتیر محمد کی پہلی ملاقات 1940 کی دہائی کے اواخر میں سنگاپور میں میڈیکل کی تعلیم کے دوران ہوئی تھی۔ انہوں نے 1956 میں شادی کی تھی اور رواں برس اگست میں اپنی شادی کی 70ویں پلاٹینم سالگرہ منائی تھی۔ ان کے پسماندگان میں شوہر اور 7 بچے شامل ہیں۔

مرحومہ ملائیشیا میں صحت عامہ، خاندانی منصوبہ بندی، ماں اور بچوں کی صحت اور سماجی بہبود کے شعبوں میں گراں قدر خدمات کے باعث ایک انتہائی نمایاں اور ہر دلعزیز شخصیت سمجھی جاتی تھیں۔ وہ ملائیشیا کی خاتون اول طبی افسران میں سے ایک تھیں اور انہیں عوامی سطح پر ان کے سادہ مزاج، خوش اخلاقی اور نرم گوئی کی وجہ سے بھی جانا جاتا تھا۔ سابق وزیراعظم مہاتیر محمد جو اس وقت 101 برس کے ہیں، ماضی میں کئی بار اپنی سیاسی اور ذاتی زندگی کی کامیابیوں میں سیتی حسمہ کے کلیدی اور اہم کردار کا اعتراف کر چکے ہیں۔ یاد رہے کہ مہاتیر محمد ملائیشیا کی تاریخ میں سب سے طویل عرصے تک وزیراعظم رہنے والے رہنما ہیں، جو پہلی بار 1981 سے 2003 اور پھر 2018 سے 2020 تک اس منصب پر فائز رہے۔