بلوچستان اور ڈیرہ اسماعیل خان میں سیکیورٹی فورسز کے انٹیلی جنس بیسڈ آپریشنز، 77 دہشت گرد ہلاک
سخت کارروائیاں، 96 گھنٹوں میں 73 خوارج مارے گئے، اسلحہ اور افغانی کرنسی برآمد۔
سیکیورٹی فورسز کے کامیاب انٹیلی جنس بیسڈ آپریشنز کے دوران اسلحہ اور گولہ بارود برآمد۔
ملک میں امن و امان کے قیام اور دہشت گردی کے ناسور کے مکمل خاتمے کے لیے عزمِ استحکام ویژن کے تحت سیکیورٹی فورسز کی کارروائیاں پوری قوت سے جاری ہیں۔ پاک فوج کے شعبہ تعلقات عامہ (آئی ایس پی آر) اور سیکیورٹی ذرائع کے مطابق گزشتہ چند روز کے دوران بلوچستان اور خیبر پختونخوا میں کیے گئے کامیاب انٹیلی جنس بیسڈ آپریشنز کے دوران مجموعی طور پر 77 دہشت گردوں کو جہنم واصل کر دیا گیا ہے۔
آئی ایس پی آر کی جانب سے جاری کردہ تفصیلی بیان کے مطابق بلوچستان کے مختلف علاقوں میں فتنۃ الخوارج اور فتنۃ الہندوستان کے خلاف گزشتہ 96 گھنٹوں کے دوران بھرپور کارروائیاں کی گئیں۔ انٹیلی جنس اطلاعات پر 21 ستمبر کو زیارت اور گرد و نواح کے علاقے شعبان میں دہشت گردوں کے ٹھکانوں کو نشانہ بنایا گیا جہاں شدید فائرنگ کے تبادلے کے بعد 33 دہشت گرد ہلاک کیے گئے۔ اس کے علاوہ 25 ستمبر کو ضلع نوشکی میں کی گئی کارروائی کے دوران بھارتی سرپرستی میں سرگرم 11 دہشت گرد مارے گئے جبکہ مند کے مقام پر بھی سیکیورٹی فورسز نے فتنۃ الہندوستان کے 6 دہشت گردوں کو ٹھکانے لگا دیا۔
دستاویزات اور سیکیورٹی رپورٹس کے مطابق کارروائیوں کے دوران ہلاک ہونے والے دہشت گردوں کے زیرِ استعمال وسیع علاقے کو مکمل طور پر کلیئر کرا لیا گیا ہے جبکہ ان کے قبضے سے بھاری مقدار میں اسلحہ، گولہ بارود اور دھماکا خیز مواد بھی برآمد کیا گیا ہے۔ عسکری حکام کا کہنا ہے کہ یہ خوارج اور افغان پراکسیز مقامی آبادی کے لیے سنگین خطرہ بن رہی تھیں، اور دہشت گردی میں افغان طالبان رجیم کا ملوث ہونا امن کے لیے باعثِ تشویش ہے جسے بھارتی پشت پناہی اور مکمل معاونت حاصل ہے۔
ادھر خیبر پختونخوا کے ضلع ڈیرہ اسماعیل خان میں بھی سیکیورٹی فورسز نے انٹیلی جنس بیسڈ آپریشن کے دوران فتنہ الخوارج کے 4 دہشت گردوں کو ہلاک کر دیا۔ سیکیورٹی ذرائع کے مطابق دہشت گردوں کی نقل و حرکت پر کڑی نظر رکھی گئی تھی اور اس کامیاب کارروائی کے دوران ہلاک ہونے والے خارجی عناصر سے بھاری مقدار میں اسلحہ، گولہ بارود اور افغانی کرنسی بھی برآمد کی گئی ہے۔
وفاقی وزیرِ داخلہ محسن نقوی نے بلوچستان اور دیگر علاقوں میں سیکیورٹی فورسز کی کامیاب کارروائیوں پر انہیں خراجِ تحسین پیش کیا ہے۔ انہوں نے اپنے بیان میں کہا کہ پوری قوم دہشت گردی کے خاتمے کے لیے سیکیورٹی فورسز کے شانہ بشانہ کھڑی ہے اور فتنۃ الہندوستان و فتنۃ الخوارج کے مکمل خاتمے تک یہ آپریشنز بلا تعطل جاری رہیں گے۔