حنا جاوید قتل کیس کی تحقیقات کیلئے اعلیٰ سطحی کمیٹی قائم

لاہور اور راولپنڈی میں پیش آنے والے ہائی پروفائل قتل کے واقعے پر پنجاب حکومت نے وزیراعلیٰ مریم نواز شریف کی ہدایت پر حنا جاوید قتل کیس کی تحقیقات کے لیے ایک ہائی پاورڈ کمیٹی تشکیل دے دی ہے۔ ذرائع کے مطابق اس اعلیٰ سطح کی تحقیقاتی کمیٹی کی سربراہی سی سی ڈی کے سربراہ سہیل ظفر چٹھہ کریں گے جبکہ ڈی آئی جی لاہور شعیب خرم اور ایس ایس پی انویسٹی گیشن راولپنڈی سیف اللہ بھی کمیٹی کے اراکین میں شامل ہیں۔

ذرائع کا کہنا ہے کہ یہ ہائی پاورڈ کمیٹی حنا جاوید قتل کیس کی تفتیش کا ازسرنو جائزہ لے گی اور رواں ہفتے راولپنڈی کا دورہ کرے گی۔ اس دورے کے دوران کمیٹی جائے وقوعہ کا باریک بینی سے معائنہ کرے گی اور اب تک کی جانے والی تفتیش کا تفصیلی جائزہ لے گی۔ دریں اثنا، پولیس ذرائع کے مطابق راولپنڈی پولیس کو کیس سے متعلق تمام فرانزک نمونوں کی رپورٹس موصول ہو چکی ہیں، جن میں پوسٹ مارٹم کی حتمی رپورٹ بھی شامل ہے۔ وزیراعلیٰ پنجاب کی جانب سے تشکیل دی گئی اس خصوصی کمیٹی نے مقتولہ کے اہلخانہ سے بھی رابطہ کر لیا ہے۔

واضح رہے کہ حنا جاوید کو 21 اگست کو ان کے گھر میں بے رحمانہ طریقے سے قتل کیا گیا تھا۔ اس واقعے کا مقدمہ تھانہ سول لائن میں درج کیا گیا تھا جس کے مطابق مقدمے میں نامزد مقتولہ کے شوہر فیصل اصغر اور گھریلو ملازم ذیشان ارشد اس وقت جوڈیشل ریمانڈ پر اڈیالہ جیل میں بند ہیں۔ مقتولہ کے اہلخانہ نے اس سے قبل راولپنڈی پولیس کی ابتدائی تفتیش پر شدید تحفظات کا اظہار کیا تھا، اور اس سلسلے میں پارلیمنٹ کی کاکس کمیٹی اور قومی کمیشن برائے انسانی حقوق کو بھی باقاعدہ خطوط ارسال کیے گئے تھے۔