یوگنڈا کی تورو سلطنت میں سابق ٹی وی صحافی نئے بادشاہ منتخب

یوگنڈا کی تاریخی تورو سلطنت میں ایک اہم پیش رفت کے تحت سابق ٹی وی صحافی اور نیوز اینکر پرنس ایڈورڈ روکیدی کیجانانگوما کو نیا بادشاہ منتخب کر لیا گیا ہے۔ خبر رساں اداروں کے مطابق 56 سالہ ایڈورڈ روکیدی طویل عرصے تک یوگنڈا کے سرکاری نشریاتی ادارے میں نیوز اینکر اور ایڈیٹر کے طور پر فرائض انجام دیتے رہے ہیں۔ انہیں شاہی بابیٹو قبیلے کی 21 رکنی کمیٹی نے متفقہ طور پر تورو سلطنت کے نئے بادشاہ کے طور پر منتخب کیا ہے اور انہیں شاہی نام “ایڈورڈ روکیدی نیابونگو اول” دیا گیا ہے۔

دستاویزات اور دستیاب رپورٹس کے مطابق سابق بادشاہ اویو نیِمبا 27 اگست 2026 کو 34 سال کی عمر میں کینسر کے باعث انتقال کر گئے تھے۔ وہ 1995 میں محض 3 سال کی عمر میں تخت نشین ہوئے تھے۔ نئے بادشاہ ایڈورڈ کی تاج پوشی کی تقریب فورٹ پورٹل میں روایتی رسومات کے ساتھ منعقد ہوئی، جس میں روایتی جنگ کی علامتی رسم بھی شامل تھی۔

دوسری جانب، مرحوم بادشاہ اویو نیِمبا کی والدہ ملکہ کیمیگسا اور خاندان کے بعض دیگر افراد نے اس نئے انتخاب پر شدید اعتراضات اٹھائے ہیں۔ ان کا کہنا ہے کہ مرحوم بادشاہ اپنے پیچھے ایک کم عمر بیٹا چھوڑ گئے تھے اور اپنی وصیت میں اسی کو اپنا جانشین نامزد کیا تھا۔ تاہم، شاہی بابیٹو قبیلے نے مؤقف اختیار کیا ہے کہ اس مبینہ وارث کو کبھی بھی باضابطہ طور پر قبائلی عمائدین کے سامنے پیش نہیں کیا گیا، اس لیے تمام روایتی طریقہ کار اور قوانین کو مدنظر رکھتے ہوئے پرنس ایڈورڈ روکیدی کو قانون کے مطابق نیا بادشاہ منتخب کیا گیا ہے۔