کراچی کے علاقے گلستان جوہر میں مسلح ڈاکوؤں کی راہ گیر خواتین سے لوٹ مار

کراچی کے علاقے گلستان جوہر میں ڈکیتی اور راہزنی کی ایک اور واردات میں مسلح موٹر سائیکل سوار ملزمان نے راہ گیر خواتین کو اسلحے کے زور پر لوٹ لیا۔ واقعے کی سی سی ٹی وی فوٹیج سوشل میڈیا پر تیزی سے وائرل ہو رہی ہے، جس نے علاقے میں بڑھتے ہوئے اسٹریٹ کرائمز اور شہریوں کے عدم تحفظ کو ایک بار پھر بے نقاب کر دیا ہے۔

وائرل فوٹیج کے مطابق دونوں ملزمان نے اپنی شناخت چھپانے کے لیے ماسک پہن رکھے تھے اور انہوں نے شلوار قمیص زیب تن کی ہوئی تھی۔ فوٹیج میں دیکھا جا سکتا ہے کہ موٹر سائیکل پر سوار یہ ملزمان ایک رہائشی گلی میں داخل ہوئے، جہاں ایک ڈاکو نے موٹر سائیکل سے اتر کر گلی سے گزرنے والی 4 خواتین کو اسلحے کے زور پر روک لیا اور ان سے زبردستی موبائل فون چھیننے لگا۔

واردات کے دوران خواتین کو شدید خوف و ہراس میں مبتلا دیکھا گیا۔ فوٹیج میں دیکھا جا سکتا ہے کہ عبایا پہنی ہوئی ایک لڑکی اپنا موبائل فون دینے کے بعد جان بچانے کے لیے وہاں سے بھاگ نکلی۔ واردات کو انجام دینے کے بعد دونوں ملزمان بظاہر انتہائی اطمینان کے ساتھ موقع سے فرار ہونے میں کامیاب ہو گئے۔ شہریوں اور سماجی حلقوں نے پولیس حکام سے مطالبہ کیا ہے کہ فوری طور پر اس واقعے کا نوٹس لیا جائے اور ملوث ملزمان کو گرفتار کر کے شہر میں بڑھتی ہوئی ڈکیتی کی وارداتوں پر قابو پایا جائے۔