ایرانی صدر کوپ 31 کانفرنس میں شرکت کے لیے ترکیہ پہنچ گئے

انطالیہ: ایرانی صدر مسعود پزشکیان اقوام متحدہ کی 31ویں عالمی موسمیاتی کانفرنس میں شرکت کے لیے ترکیہ پہنچ گئے، جہاں وہ امریکا اور اسرائیل کی کارروائیوں سے ماحول کو پہنچنے والے مبینہ نقصانات کا معاملہ اٹھائیں گے۔

ایران کی سرکاری خبر رساں ایجنسی ارنا کے مطابق مسعود پزشکیان بدھ کے روز ترکیہ کے شہر انطالیہ پہنچے۔ وہ کانفرنس میں شریک مختلف ممالک کے رہنماؤں اور اعلیٰ حکام سے ملاقاتیں بھی کریں گے۔

ان ملاقاتوں کے دوران علاقائی صورت حال، دوطرفہ تعلقات اور دیگر اہم امور پر تبادلہ خیال متوقع ہے۔

تہران سے روانگی سے قبل ایرانی صدر نے کہا تھا کہ کانفرنس میں امریکا اور اسرائیل کی ایسی کارروائیوں پر بات کی جائے گی جن کے باعث ماحول کو نقصان پہنچا ہے۔

مسعود پزشکیان کا کہنا تھا کہ ایران اس عالمی فورم کے ذریعے ماحولیاتی نقصانات اور خطے کو درپیش مسائل کی جانب عالمی برادری کی توجہ مبذول کرانے کی کوشش کرے گا۔