کوہلو میں سکیورٹی فورسز کی کارروائی میں 8 دہشتگرد ہلاک، پاک فوج کے میجر اور حوالدار شہید

پاک فوج کے شعبہ تعلقات عامہ (آئی ایس پی آر) کے جاری کردہ بیان کے مطابق ملک کے مختلف حصوں میں سکیورٹی فورسز نے کامیاب انٹیلی جنس بیسڈ آپریشنز کے دوران مجموعی طور پر 24 دہشت گردوں اور خوارج کو ہلاک کر دیا ہے جبکہ کارروائیوں کے دوران پاک فوج کے 4 بہادر جوانوں نے جامِ شہادت نوش کیا ہے۔

دستاویزات اور پریس ریلیز کے مطابق بلوچستان کے علاقوں کولپور، کردگاپ اور نوشکی کے گردونواح میں سکیورٹی فورسز نے کارروائیاں کیں۔ کولپور میں ہونے والی کارروائی کے دوران 8 دہشت گرد ہلاک کیے گئے جن کے قبضے سے اسلحے اور گولہ بارود کا بڑا ذخیرہ برآمد ہوا۔ ترجمان پاک فوج کے مطابق 14 نومبر کو دہشت گردوں نے گشت پر مامور سکیورٹی فورسز کی گاڑیوں کو مسلح کواڈ کاپٹر ڈرونز کے ذریعے بزدلانہ نشانہ بنایا، جس کے نتیجے میں ضلع چکوال کے رہائشی میجر عمر منہاس ناصر اور کوٹلی ستیاں کے رہائشی حوالدار محمد عدنان خان شہید ہو گئے۔

دوسری جانب شمالی وزیرستان اور گردونواح میں بھی سکیورٹی فورسز نے کارروائیاں کرتے ہوئے گزشتہ 12 گھنٹوں میں 16 خوارج کو ہلاک کر دیا۔ آئی ایس پی آر کے مطابق علی خیل میں کارروائی کے دوران 12 خوارج ہلاک ہوئے جن میں بھارتی سرپرستی میں سرگرم فتنہ الخوارج کے 2 افغان شہری بھی شامل ہیں، جبکہ میر علی اور دتہ خیل میں 2، 2 خوارج مارے گئے۔ ان کارروائیوں کے دوران فائرنگ کے شدید تبادلے میں ضلع صوابی کے 43 سالہ حوالدار عصمت علی اور ضلع مردان کے 32 سالہ نائیک آفتاب علی نے بھی جامِ شہادت نوش کیا۔

وزیراعظم محمد شہباز شریف اور وفاقی وزیر داخلہ محسن نقوی نے سکیورٹی فورسز کے کامیاب آپریشنز کو سراہتے ہوئے خوارج کو جہنم واصل کرنے پر جوانوں کی پیشہ ورانہ صلاحیتوں کی تعریف کی۔ رہنماؤں نے شہداء کو زبردست خراجِ عقیدت پیش کرتے ہوئے اس عزم کا اظہار کیا کہ ملک سے دہشت گردی کے مکمل خاتمے تک عزمِ استحکام کے تحت کارروائیاں پوری قوت سے جاری رہیں گی۔