سائٹ ایریا میں فوم کی فیکٹری میں آتشزدگی، 6 فائر فائٹرز زخمی

کراچی: شہر قائد کے علاقے سائٹ ایریا میں واقع فوم کی فیکٹری میں لگی آگ بے قابو ہوگئی جس کی زد میں آکر 6 فائر فائٹرز بھی زخمی ہوگئے۔
تفصیلات کے مطابق کراچی کے علاقے سائٹ ایریا میں ضیا واٹر پر واقع فوم فیکٹری میں صبح آگ لگی تھی۔ اہل علاقہ کا کہنا ہے کہ آگ صبح 8 بجے لگی تھی جس پر فائر بریگیڈ کی گاڑیاں موقع پر پہنچ کر آگ پر قابو پالیا تھا۔ تاہم آگ نے اچانک سے پھر شدت اختیار کرلی۔
پولیس کے مطابق فیکٹری میں آتشزدگی لگنے کی وجوہات تاحال معلوم نہیں ہو سکی ہیں۔ فیکٹری میں کسی شخص کے پھنسے ہونے کی اطلاع نہیں ہے۔
فائر بریگیڈ حکام کے مطابق فیکٹری میں فوم ہونے کی وجہ سے آگ نے شدت اختیار کرلی اور بے قابو ہوگئی ہے۔ فائر بریگیڈ کے 10 فائر ٹینڈر، ایک واٹر باؤزر اور ایک اسنارکل آگ بجھانے میں مصروف ہے۔ آگ پر قابو پانے کے دوران فیکٹری کا 30 فیصد حصہ زمین بوس ہوگیا جس سے 6 فائر فائٹرز زخمی بھی ہوگئے جنہیں فوری طور پر طبی امداد کے لئے قریبی اسپتال منتقل کردیا گیا۔