بغیر نمبر پلیٹ گاڑی میں ڈپلومیٹک انکلیو میں داخلےکی کوشش،خاتون کیخلاف مقدمہ درج

اسلام آباد:اسلام آباد میں بغیر نمبر پلیٹ والی گاڑی میں سوار ایک خاتون نے ڈپلومیٹک انکلیو میں داخل ہونے کی کوشش کی اور روکنے پر سیکیورٹی اہلکاروں کو دھمکیاں بھی دیں۔
ڈپلومیٹک انکلیو کی ڈیوٹی پر تعینات پولیس افسر کی جانب سے تھانہ سیکرٹریٹ میں دائر کرائی گئی درخواست میں بتایا گیا کہ ڈاکٹر شہلا نامی خاتون نے بغیر نمبر پلیٹ والی گاڑی کے ساتھ اندر جانے کی کوشش کی۔
ایف آئی آر کے متن کے مطابق ڈیوٹی آفسر نے خاتون کو اندر جانے کی اجازت نہ دی جس پر خاتون نے پولیس اہلکاروں کے ساتھ نہ صرف بدتمیزی کی بلکہ انہیں گاڑی اوپر چڑھانے اور سنگین نتائج کی دھمکیاں بھی دیں۔
پولیس حکام کا کہنا ہے کہ اہلکاروں کو دھمکانے والی خاتون کے خلاف مقدمہ درج کر کے واقعے کی تحقیقات کا آغاز کر دیا گیا ہے۔