گدو پاور ہاؤس کے 3 یونٹ ٹرپ، سندھ، پنجاب کوسپلائی معطل

کشمور: شدید دھند کے باعث گدو تھرمل پاور ہاؤس میں 3 یونٹ ٹرپ کر گئے جس کے باعث سندھ، پنجاب اور بلوچستان کے مختلف اضلاع میں بجلی کی فراہمی معطل ہے۔
ذرائع کا کہنا ہے کہ دھند کم ہونے کے بعد یونٹ کو بحال کردیا جائے گا جس کے بعد متاثرہ اضلاع کو معمول کے مطابق بجلی فراہم کی جائے گی۔
دھند کی وجہ سے تھرمل پاور ہاؤس کے 747 میگاواٹ کے تین یونٹ ٹرپ کر گئے اور بجلی سسٹم سے نکل جانے کے باعث سندھ سمیت پنجاب اور بلوچستان کے مختلف اضلاع میں بجلی کی فراہم بند ہوگئی ہے۔
گزشتہ روز بھی دھند کے باعث 4 پاور پلانٹس گدو، بلوکی، نشاط اور نشاط چونیاں پاور پلانٹس ٹرپ کر گئے تھے جس سے مجموعی طور پر 2500 میگاواٹ بجلی کے شارٹ فال کا سامنا رہا جس کی وجہ سے لاہور میں لوڈشیڈنگ کا دورانیہ بڑھانا پڑا۔