غربت اور مہنگائی سے تنگ شخص نے بیوی،2 بیٹیوں اور بیٹے کو قتل کرکے خود کشی کر لی

ٹانک میں ایک شخص نے فائرنگ کرکے بیوی، دو بیٹیوں اور ایک بیٹے کو قتل کرنے کے بعد خود کو بھی گولی مار کر خودکشی کرلی۔

ٹانک کے محلہ قاضیانوالہ میں مہنگائی، تنگدستی اور قرض خواہوں کے بار بار تقاضے سے پریشان شخص سید رسول نے گھر میں سوئے افراد پر اندھا دھند فائرنگ کر دی جس سے اس کی بیوی، دو بیٹیاں اور بیٹا موقع پر ہی جاں بحق اور دو بچے زخمی ہو گئے۔

پولیس کے مطابق ملزم نے بعد میں خود کو بھی گولی مار کر اپنی زندگی کا خاتمہ کر لیا۔ زخمی بچوں کو علاج و معالجے کے لیے ڈسٹرکٹ اسپتال منتقل کر دیا گیا ہے۔

فائرنگ کے نتیجے میں قتل ہونے والے افراد کے جسد خاکی ضروری کارروائی کے بعد ورثا کے حوالے کر دیے گئے ہیں جب کہ پولیس نے واقعہ کی تحقیقات شروع کر دی ہے۔