قومی کرکٹ ٹیم دورہ انگلینڈ اور ورلڈ کپ کے لیے لندن پہنچ گئی

قومی کرکٹ ٹیم دورہ انگلینڈ اور ورلڈ کپ کے لیے لندن پہنچ گئی۔

جیت کا عزم لیے قومی کرکٹ ٹیم جوش و خروش کے ساتھ لاہور ائیر پورٹ سے لندن پہنچی جہاں وہ ورلڈ کپ سے قبل انگلینڈ کے خلاف 5 ایک روزہ میچز پر مشتمل سیریز اور ایک ٹی ٹوئنٹی میچ کھیلے گی۔

دورہ انگلینڈ اور ورلڈ کپ کے لیے 17 رکنی ٹیم روانہ ہوئی جس میں فخر زمان، امام الحق، محمد حفیظ، سرفراز احمد، عماد وسیم، حسن علی، محمد عامر، جنید خان، یاسر شاہ شامل ہیں۔

اس کے علاوہ محمد حسنین، عابد علی، بابر اعظم اور شاہین آفریدی بھی انگلینڈ جانے والوں میں شامل ہیں جب کہ شعیب ملک دبئی سے ٹیم کو جوائن کریں گے۔

Pakistan's @cricketworldcup-bound squad off to the UK. The spirit, the unity, the desire, one for all, all for one! #WeHaveWeWill pic.twitter.com/Qb4UqF5jOB

— Pakistan Cricket (@TheRealPCB) April 22, 2019

قومی کرکٹ ٹیم 27 اپریل کو انگلینڈ کے مقامی کلب کینٹ کاؤنٹی کے خلاف میچ سے دورے کا آغاز کرے گی جس کے بعد پاکستان اور انگلینڈ کے درمیان واحد ٹی ٹوئنٹی میچ 5 مئی کو کھیلا جائے گا۔ \

ورلڈکپ کا افتتاحی میچ انگلینڈ اور جنوبی افریقا کے درمیان 30 مئی کو کھیلا جائے گا، پاکستانی ٹیم اپنا پہلا میچ ویسٹ انڈیز کے خلاف 31 مئی کو کھیلے گی جب کہ ورلڈ کپ میں پاکستان اور بھارت کے درمیان ٹاکرا 16 جون کو ہوگا۔

لندن روانہ ہونے سے قبل کپتان سرفراز احمد کا کہنا تھا کہ ٹیم اچھا پرفارم کرے گی ایک نہیں تمام کھلاڑی ٹرمپ کارڈ ہیں۔

ادھر ہیڈ کوچ مکی آرتھر نے سیمی فائنل تک رسائی کو پہلا ٹارگٹ قرار دیا ہے۔