بچے کل اسکول جانے کی تیاری کریں،کوئی چھٹی نہیں ہو گی۔سندھ حکومت

کراچی سمیت سندھ بھرکے تعلیمی اداروں میں موسمِ سرما کی تعطیلات آج (31 دسمبر 2019ء کو) ختم ہو رہی ہیں اور کل (یکم جنوری 2020ء) سے صوبے کے تمام نجی و سرکاری تعلیمی ادارے کھل جائیں گے۔

صوبائی سیکریٹری اسکول ایجوکیشن احسن منگی نے کہا ہے کہ کراچی سمیت سندھ بھر کے تمام سرکاری و نجی اسکولزکل (بدھ) یکم جنوری سے ہی کھولے جائیں گے۔

میڈیا سے خصوصی گفتگو کرتے ہوئے انہوں نے سندھ میں موسم سرما کی تعطیلات میں توسیع کے حوالے سے گردش کرنے والی افواہوں کی تردید کرتے ہوئے کہا کہ ایسی کوئی تجویززیرغورنہیں کہ اسکولوں میں موسمِ سرما کی تعطیلات میں اضافہ کیا جائے۔

واضح رہے کہ ملک بھر میں شدید سردی کی لہر جاری ہے جس کے باعث ایسی اطلاعات گردش میں تھیں کہ شاید چھٹیوں میں اضافہ ہوجائے تاہم سندھ کے سیکریٹری برائے ایجوکیشن نے بیان جاری کیا ہے کہ موسم سرما کی تعطیلات میں اضافہ نہیں کیاجارہاہے،یکم جنوری دوہزار بیس سے تمام تعلیمی ادارے کھل جائیں گے۔

دوسری جانب  پنجاب اورخیبر پختونخوا میں سردی کی شدت میں اضافے کے باعث تعلیمی اداروں میں موسمِ سرما کی تعطیلات میں 7 جنوری 2020ء تک اضافہ کردیا گیا ہے۔