سیلاب زدگان کیلئے تنخواہوں سے کٹوتی۔ خیبرپختون میں اپوزیشن کی مخالفت

پشاور(امت نیوز) خیبرپختون اسمبلی میں اپوزیشن ارکان نے سیلاب زدگان کی مدد کے لیے تنخواہوں سے کٹوتی کی مخالفت کرتے ہوئے سیکرٹری خزانہ کو مراسلہ ارسال کردیا۔
صوبائی سیکرٹری خزانہ کو کٹوتی نہ کرنے کا خط ارسال کرنے والے 51 ارکان میں جے یو آئی، پی پی پی، مسلم لیگ(ن) ، جماعت اسلامی اور اے این پی کے علاوہ بلوچستان عوامی پارٹی کے ارکان بھی شامل ہیں۔
اراکین کی جانب سے ارسال کیے گئے مراسلے میں مؤقف اختیار کیا گیا ہے کہ وہ متاثرین کی مدد خود کریں گے۔
اس پر ردعمل کا اظہار کرتے ہوئے وزیراعلیٰ محمود خان نے کہا کہ عوامی نمائندوں کا اپنے ہی عوام کی مدد سے انکار افسوس ناک ہے، سیلاب زدگان کی بحالی قومی مسئلہ ہے۔
وزیراعلی نے کہا کہ عوامی فلاح اپوزیشن کا مقصد نہیں، ان کا مقصد قومی خزانے کو لوٹنا ہے، عوام انہیں دیکھ رہے ہیں، یہ ان (اپوزیشن ارکان) کے لیے شرم سے ڈوب مرنے کا مقام ہے۔