کراچی میں ویلڈنگ کی دکان میں دھماکےسےایک شخص جاں بحق

کراچی (اسٹاف رپورٹر)موچکومیں ڈیزل کی ٹینکی میں ویلڈنگ کے دوران دھماکے سے ایک شخص جاں بحق ہوگیا۔ تفصیلات کے مطابق موچکوکے علاقے بلدیہ رئیس گوٹھ میں قائم ویلڈنگ کی دکان میں زوردار دھماکہ ہوا جس کی آواز دور دور تک سنی گئی ۔ دھماکے سے علاقے میں خوف و ہراس پھیل گیا، اس اطلاع پر پولیس اور ریسکیو عملہ موقع پر پہنچ گیا ۔اس حوالے ایس ایچ او چوہدری شاہد نے بتایاکہ دھماکہ ڈیزل کی ٹینکی میں ویلڈنگ کے دوران ہوا جس کے نتیجے میں ویلڈنگ کا کام کرنے والا شخص 35 سالہ شوکت ولد نور احمد جاں بحق ہوگیا جس کی لاش کو سول اسپتال منتقل کیا گیا۔ انہوں نے بتایا کہ متوفی اسی علاقے کا رہنے والا تھا ، تاہم ابتدائی تفتیش کے دوران معلوم ہوا کہ واقعہ حادثاتی طور پرہوا اور تخریب کاری کے کوئی شواہد نہیں ملے۔