کراچی : گٹر میں دم گھٹنے سے خاکروب ہلاک۔ بچی نالے میں بہہ گئی

کراچی(اسٹاف رپورٹر) شہر قائد میں مختلف حادثات و واقعات میں بچی سمیت 3 افراد جاں بحق،گٹر میں دم گھٹنے سے خاکروب ہلاک۔تفصیلات کے مطابق سرجانی ٹاؤن میں گٹر لائن کی صفائی کے دوران دم گھٹنے سے خاکروب ہلاک ہوگیا،اطلاع ملتے ہی پولیس اور ریسکیوٹیم موقع پر پہنچ گئی اور لاش کو اپنی تحویل میں لیکر عباسی اسپتال منتقل کردیا،پو لیس کے مطابق متوفی کی عمر 52سال کے قریب ہے اور قبضے سے ایسی کوئی چیز بھی برآمد نہیں ہوئی ہے جس کی مددسے لاش کی شناخت ہوسکے۔علاوہ ازیں لیاری ایکسپریس وے ریکسل پُل کے قریب سڑک عبورکرنے والے راہگیر کو تیزرفتارگاڑی نے کچل دیا ،متوفی کی لاش سول اسپتال پہنچائی گئی ،جہاں متوفی کی فوری شناخت نہیں ہوسکی۔جبکہ نیو کراچی شفیق موڑ کے قریب کھیل کھیل میں بچی نالے میں بہہ گئی،ڈھائی سالہ بچی کھیلتے کھیلتے نالے میں گرگئی تھی،ایدھی ایمبولینس اور بحری خدمات کی ٹیم جائے وقوعہ پر پہنچ گئی، ایدھی رضاکاروں کا بچی کی تلاش کے لیے ریسکیو آپریشن تین گھنٹے جاری رہا تاہم ڈھائی سالہ علینہ کی لاش گارڈن دھوبی گھاٹ نیازی محلہ کے قریب سے مل گئی۔ دوسری جانب پاک کالونی کے علاقے میں گٹرباغیچہ کے قریب کرنٹ لگنے سے ایک شخص جاں بحق ہوگیا ،اطلاع ملتے ہی پولیس اور ریسکیوٹیم مو قع پر پہنچ گئی اور 50سالہ شخص کی لاش کواپنی تحویل میں لیکر عباسی بعدازاں کارروائی کے بعد سردخانے منتقل کردیا ،پولیس کے مطابق متوفی کچراچننے والا مزدور بتایا جاتا ہے۔