کراچی : لیاقت آباد میں ڈاکوؤں نے رقم نہ دینے پر شہری کو گولی ماردی

کراچی(اسٹاف رپورٹر)شہر میں اسٹریٹ کرائم اورڈکیتی کی وارداتیں تاحال تھم نہ سکی۔ لیاقت آباد بی ون ایریا کے مارٹ میں ڈکیتی کی واردات کی سی سی ٹی وی فوٹیج سوشل میڈیا پر وائرل ہوگئی۔فوٹیج میں 2 ڈاکوؤں کو واضح طور پر مارٹ میں داخل ہوتے اور دکاندار سے رقم و موبائل فونز چھینتے دیکھا جاسکتا ہے۔

اسی دوران ایک شہری خریداری کے لئے داخل ہوتا ہے۔ڈاکواس شہری سے بھی رقم چھیننا چاہتے تھے اور رقم نہ دینے پر ڈاکوؤں نے شہری کو مارٹ میں اندر کی طرف دھکا دیا۔۔شہری سے رقم نہ ملنے پر ڈاکو جاتے ہوئے گولی مارکر فرار ہوجاتے ہیں،جس کے نتیجے میں 55 سالہ محمد رئیس زخمی ہوکر نیچے گر پڑتا ہے۔ واقعہ جمعرات کی شب 11 بجے پیش آیا۔زخمی محمد رئیس سینئر صحافی نسیم کا قریبی رشتے دار ہے۔