لاہور میں عافیہ صدیقی کی سالگرہ کی تقریب ،رہائی کا مطالبہ

لاہور ( نمائندہ امت) امریکی قید میں علیل پاکستانی شہری ڈاکٹر عافیہ صدیقی کا گولڈن جوبلی یوم پیدائش لاہور پریس کلب کے سامنے منایا گیا جہاں ان کی سالگرہ کا کیک کاٹا گیا اور ان کی رہائی کا مطالبہ  کیا گیا

عافیہ موومنٹ کے رہنماﺅں اور کارکنوں نے لاہور پریس کلب کے سامنے ڈاکٹر عافیہ صدیقی کی رہائی میں دلچسپی نہ لینے پر حکومتِ پاکستان پر کڑی تنقید کی ۔

اس موقع پر خواتین اور بچوں سمیت زندگی کے مختلف شعبوں سے تعلق رکھنے والے افراد موجود تھے ۔

عافیہ موومنٹ اور ٹم گرین پاکستان کے رہنماﺅں عبداللہ منصور ، ملک محسن اعوان سمیت دیگر مقررین نے کہا کہ امریکی جیل میں ڈاکٹر عافیہ کی حالت انتہائی ناگفتہ بہ ہے جنہیں ادویات تک فراہم نہیں کی جارہیں ، انہیں جس طرح ایک سازش کے تحت پابندِ سلاسل رکھا گیا اسی طرح ان کی موت کی بھی سازش کی جارہی ہے  لیکن پاکستان کی حکومت پاکستان کی بیٹی کی رہائی کیلئے ہم وطنوں کی آواز پر کان نہیں دھر رہی ۔