کراچی : ڈاکوؤں کو کرائے پر اسلحہ دینے والے 5ملزم گرفتار

کراچی(اسٹاف رپورٹر)رینجرزاور پولیس نے ڈکیت گروہ کا سرغنہ جو جرائم پیشہ افراد کوکرائے پر اسلحہ فراہم کرنے میں ملوث سمیت5ملزمان کو گرفتار کرلیا۔تفصیلات کے مطابق رینجرز اور پولیس نے انٹیلی جنس معلومات کی بنیاد پر مشترکہ کاروائی کرتے ہوئے کراچی کے علاقے قصبہ کالونی کٹی پہاڑی سے انتہائی مطلوب اسٹریٹ کرائم میں ملوث گروہ کے5 ملزمان سلیمان عرف بھائی، محمد ظہور عرف ظہورے، افضل خان، محمد ہارون اور عبدالغنی عرف شینا کو گر فتار کر لیا۔

ملزمان کے قبضے سے غیر قانونی اسلحہ بھی برآمد کر لیا گیا۔ترجمان رینجرزکے مطابق ملزمان کراچی کے مختلف علاقوں میں اسلحے کے زور پر متعدد ڈکیتی کی وارداتوں میں بھی ملوث ہیں۔ملزم سلیمان عرف بھائی پولیس کے ساتھ دوران ڈکیتی مقابلے میں زخمی ہوکر جیل جا چکا ہے۔ دوران تفتیش ملزم محمد ظہور عرف ظہورئے نے انکشاف کیا کہ وہ ڈکیت گروہ کا سرغنہ ہے اور جرائم پیشہ افراد کوکرائے پر اسلحہ فراہم کرنے میں بھی ملوث ہے۔ملزمان کے دیگر ساتھیوں کی گرفتاری کے لیے چھاپے مارے جا رہے ہیں۔ گرفتارملزمان کو بمعہ برآمد شدہ اسلحہ مزید قانونی کاروائی کے لیے پولیس کے حوالے کر دیا گیا ہے۔