سیکڑوں موٹرسائیکلیں چھیننے والے گروہ کا سرغنہ پکڑا گیا

کراچی(اسٹاف رپورٹر)عزیزآباد پولیس نے سیکڑوں موٹرسائیکلیں چھیننے میں ملوث گروہ کے سرغنہ کو مقابلے کے بعد زخمی حالت میں گرفتار کرلیا۔پولیس کے مطابق ملزم اکرام عرف منا ولد شمس الدین کو کراچی اکیڈمی اسکول بلاک 2 سے مقابلے کے بعد گرفتار کیا گیا۔ملزم نے اپنے ساتھیوں کے ساتھ مل کر مختلف علاقوں سے سیکڑوں موٹرسائیکلیں چھیننے کا اعتراف کرلیا۔

ملزم نے بتایا کہ چھینی موٹرسائیکلیں خضدار کے خریداروں کو فروخت کی جاتی تھیں۔ملزم 10 سالوں میں 100 سے زائد موٹر سائیکلیں چھین چکا ہے۔زخمی ملزم کئی بار گرفتار ہوکر جیل بھی جاچکا ہے۔23 مارچ کو طارق روڈ پر بزرگ شہری کا دوران ڈکیتی مزاحمت پر قتل ہوا۔اس واقعہ کی سی سی ٹی وی فوٹیج میں بھی ملزم کی میچنگ ہوئی ہے۔

ملزم نے 2021 میں شاہ فیصل کالونی میں بھی مزاحمت پر ایک شخص کو گولی ماری تھی۔نیو ٹاؤن پولیس نے مقابلے کے بعد 2 ملزمان غلام فرید اور زبیر کو زخمی حالت میں گرفتارکرکے 2 پستول ، موٹرسائیکل اور دیگر سامان برآمد کرلیا۔